Leikbólkurin Det Ferösche Compagnie, DFC, vil hava somu fíggjarligu treytir sum aðrir leikbólkar í Føroyum.

Í einum skrivi til fíggjarnevnd Løgtingsins søkir bólkurin um eina árliga játtan á 400.000 krónur.

Sambært DFC hava tríggir av fýra sjónleikabólkum eina játtan á 400.000 krónur hvør í uppskotinum til komandi fíggjarlóg, meðan DFC stendur uttanfyri.

– Men vit harmast um at standa einsamøll uttanfyri og skilja satt at siga heldur ikki hví, skrivar bólkurin.

DFC leggur dent á, at tey fegnast um stuðulin, sum hinir bólkarnir fáa. Áheitanin snýr seg um, at DFC eisini verður fevnt av játtanini.

Bólkurin vísir á, at støðan var tann sama á seinastu fíggjarlóg. Tá valdu tey ikki at úttala seg alment um málið.

Nú halda tey tó, at neyðugt er at gera vart við støðuna, sum tey ikki meta vera burðardygga.

Í skrivinum vísir DFC á sítt virksemi bæði í Føroyum og uttanlands.

Bólkurin nevnir millum annað leikin Lykkenborg, sum fekk M.A. Jacobsens virðisløn og varð framførdur í mentanarmiðdeplinum The Barbican í London.

Eisini nevna tey uppsetingar av Hamlet, Romeo og Juliu og King Lear. Seinast hevur bólkurin framført Prima Facie, sum sambært skrivinum varpaði ljós á føroysku samtykkislógina.

DFC sigur, at ein føst árlig játtan hevði givið bólkinum møguleika at styrkt virksemið og ment nýggjar verkætlanir.

Bólkurin heitir tí á fíggjarnevndina um at hækka játtanina til leikbólkar við 400.000 krónum, so DFC eisini kann fáa lut í stuðlinum.

Undir skrivinum standa Kristina Sørensen Ougaard, Kjartan Hansen, Dánjal á Neystabø, Sámal Blak, Jens L. Thomsen og Durita Sumberg.