Tá ið tað restaði eitt korter var tað yvurhøvur einki, sum bendi á, at 07 Vestur skuldi vinna nakað stig í heimadystinum ímóti teimum næstbestu hjá HB.
Eftir fyrra hálvleik var HB frammanfyri 3-0, og støðan var ikki broytt, tá ið tað restaði eitt korter.
Tað restaðu 12 minuttir, tá ið Dann Fróðason minkaði um munin til 3-1, og so gekk tað skjótt hjá 07 Vestur. Fýra minuttir seinni minkaði Karl Weihe um munin tl 3-2, og fimm minuttir seinni javnaði innskifti Jógvan Petersen til 3-3, sum varð úrslitið.
Rói av Fløtum legði HB framum 1-0 beinanvegin, Jógvan Skeel Nolsøe økti til 2-0 í 11. minutti, og Gilli Róason økti til 3-0 seks minuttir undan steðginum.
Felags fyri 07 Vestur og HB er, at hesi liðini ikki hava vunnið fulla úrtøku í trimum teimum fyrstu umførunum. 07 Vestur hevur trý stig eftir tríggjar javnleikir, og HB hevur tvey stig eftir tveir javnleikir og eitt tap.
Í fjórða umfari skal HB spæla á heimavølli ímóti Víkingi, og 07 Vestur skal spæla á heimavølli ímóti B68.
