Tølini yvir føsturtøkur í Noregi eru støðug.
Tað vísa tøl hjá norsku Abortskrásetingini, sum eru kunngjørd í dag, og hesi eru fyri fyrra hálvár 2024.
Tølini vísa eina afturgongd í føsturtøkum millum kvinnur í aldrinum, 25 til 29 ár, samstundis sum ein lítil vøkstur er millum kvinnur, sum eru millum 15 og 19 ár.
- Eftir vøkstur í fosturtøkum eftir koronufarsóttina, sær tað nú út til, at støðan er við at stabilisera seg í 2024 í mun ti 2023, sigur Mette Løkeland-Stai.
Hon er yvirlækni í norska Fólkaheilsuráðnum (FHI) og hevur ábyrgdina av Abortskrásetingini.
Sagt verður, at seinastu árini hava tølini yvir føsturtøkur í Noregi verið søguliga lág, men í 2022 vuksu tey aftur fyri fyrstu ferð síðan 2008.
Tølini hjá Abortskrásetingini vísa, at í 2023 vórðu framdar 12.814 fosturtøkur í Noregi, sum er ein øking á 6,7 prosent í mun til árið fyri.
- Fyribils tøl vísa, at talið av fostutøkum í fyrra hálvári í ár er stívliga 6.000.
Mette Løkeland-Stai vísir á, at tølini yvir fosturtøkur í fjør kortini vóru minni enn í tíðini fyri koronufarsóttina.
- At tølini minkaðu undir farsóttini er náttúrligt, tí tá høvdu fólk minni samband við hvønn annan.
Kvinnan, sum hevur ábyrgdina av Abortskrásetingini í Noregi, sigur, at tølini yvir fosturtøkur eftir hennara tykki framvegis eru lág - og munandi lægri enn fyri tíggju árum síðan.
Fyri fyrstu ferð í 50 ár hevur norska stjórnin skotið upp at gera broytingar í føsturtøkulógini, og her er ætlanin at leingja tíðina fyri, nær kvinnur sjálvar kunnu velja fosturtøku.
- Í dag hava norskar kvinnur loyvi at velja fosturtøku til og við 12 viku av burðartíðini, og ætlanin er, at hetta markið skal leingjast upp í 18 vikur, veit NRK at siga í morgun.
