Umleið 6.000 servand løgreglufólk eru til reiðar at basa ófriði í Bretlandi.
Tað sigur Heidi Alexander, sum er bretskur varaløgmálaráðfrúa, við BBC Radio 4.
Hon sigur eisini, at stjórnin hevur syrgt fyri, at yvir 500 fongsulspláss aftrat eru tøk.
- Vit vilja tryggja okkum, at øll, sum fáa fongsulsrevsing orsakað av ófriðinum, hava eitt pláss í fongslinum, sum bíðar eftir teimum, sigur hon.
Ófriðurin byrjaði, eftir at tríggjar gentur vórðu dripnar og tíggju fingu skaða í stungum á einum Taylor Swift dansitiltaki í Southport, norðan fyri Liverpool. Ein 17 ára gamal drongur er undir illgruna í málinum.
Harðlig mótmæli móti muslimum og móti innflyting hava síðani verið í fleiri enskum býum, eftir at skeivar upplýsingar vórðu spjaddar á netinum. Hundraðtals eru handtikin.
Í gjár boðaði Keir Starmer, forsætisráðharri, eftir bráðfeingis fund frá, at ein "standandi herur" av løgreglufólki er gjørdur.
Um tað tiltakið sigur Heidi Alexander við Times Radio:
- Hetta eru løgreglufólk, sum hava fingið serútbúgving í at handfara brotsverk móti almennari skipan.
- Um vikuskiftið høvdu vit 4.000 tøk. 2000 verða til taks hesa vikuna. Hetta merkir, at løgreglufólk kunnu setast á tey støð í landinum, har mest tørvur er á teimum.
/ritzau/dpa
