Men nú hevur Bill Justinussen broytt hugsan. Síðani veljarin – sjálvandi við Guds vilja – vrakaði Bill Justinussen á valinum 8. desember fyrraárið, er Bill Justinussen komin til ta sannføring, at hann heldur skal verða fólkafloksmaður nummar eitt. So nú kann hitt við Várharra í politikki koma í aðru røð. Og tá Gud hevur mist fyrsta plássið hjá Bill Justinussen, so nýtist hann ikki longur at stuðla flokkinum, sum hevur vrakað hann sum politikara. Einasti møguleiki hjá Bill Justinussen at koma aftur á ting er, at Jenis av Rana verður pensjóneraður – tað vil siga, at Jenis av Rana ikki stillar upp aftur til næsta val. Eitt lyfti, sum Jenis eftir øllum at døma ikki hevur givið Bill, sum tí flytur Gud eitt pláss aftur í rekkjuna – og velur politiska ávirkan ella kanska sjálvan seg framum.
Hjá Miðflokkinum hava Jenis og Bill altíð sagt, at Gud er yvir øllum. Gud er tað einasta ordiliga málið hjá flokkinum. Alt hitt, sum snýr seg um smábagatellir sum vinstra og høgra í politikki, tað hevur ongan týdning, tí tað »yvriskipaða málið er so nógv størri«. Tað »yvirskipaða málið« er, at menninir í Miðflokkinum eru meira knýttir at Gudi, enn fólk í øðrum flokkum, og at teir seta Gud hægri, enn fólk í øðrum flokkum. Tað at seta Gud ovast hevur verið so stórt í Miðflokkinum, at Jenis av Rana, sum er uppvaksin í einum javnaðarheimi í Trongisvági, kann í 30 ár meina tað sama sum ein sum Bill, sum í veruleikanum er ein fólkafloksmaður. Tí tað er trúgvin á Gud, sum heldur øllum saman.
Men so kemur ein ungur maður norðuri í Sundum inn á pallin. Sum miðfloksmaður setir hann helst Gud fram um politikk og mammon, men í øllum førum, so hevur hann útkonkurrerað Bill Justinussen, so tað stendur eftirá.
Bill sær sær eingi onnur ráð enn at flyta Gud eitt pláss aftur á politisku vágskálini – og mammon ella valdstekki ella bara tað at sóla sær sum fólksins umboð – frammum. Hann kemur knappliga – nú hann er vrakaður sum tingmaður – í tankar um, at hann í veruleikanum er fólkafloksmaður.
Til høgru fyri Jenis og oman fyri Gud.
