Revsingin fyri at tosa í handhildnari fartelefon ímeðan ein koyrir bil, er alt ov lág.
Tað heldur Ráðið fyri Ferðslutrygd. Nú Løgtingið viðgerð fleiri broytingar í ferðslulógini, hevur Ráðið fyri Ferðslutrygd eisini mælt til, at revsingin fyri at tosa í handhildnari fartelefon ímeðan ein koyrir bil, verður munandi herd.
Í løtuni er einasta revsingin fyri at tosa í handhildnari fartelefon ímeðan ein koyrir bil, ein bót á kr. 500.
-Ráðið mælir til, at hendan sekt verður hækkað úr 500 upp í 1500 krónur, fyri at fáa fleiri at lata vera at brúka handhildna fartelefon í ferðlsuni, sigur Ráðið fyri Ferðslutrygd í einum tilmælið til Løgtingið.
Ráðið sigur, at orsøkin til hetta tilmælið er, at útlendskar kanningar vísa, at gáloysni er orsøkin til 1/3 av ferðsluvanlukkum.
Harumframt vísir ein føroysk gallupkanning, ið Ráðið gjørdi í 2012, at meiri enn helvtin av føroyingum, ella 51 prosent, soga, at teir tosa javnan í handhildnari fartelefon, meðan teir koyra bil.
Samstundis sigur næstan fjórðihvør føroyingur, ella heili 24 prosent, at teir javnan brúka fartelefonina at skriva og lesa sms, meðan teir koyra bil. |
