Tað er ikki væl vorðið á Argjum. Stigaposin er framvegis skralltómur, og tað er framvegis saknur í fleiri av teimum, sum vóru ætlaðir at eiga týdningarmiklan leiklut í royndini at halda tørn um plássið í bestu deildini.
Tá ið AB í 2010 royndi seg í fremstu røð, var samlaða úrtøkan 10. plássið og 14 stig eftir tveir sigrar og átta javnleikir. Tá var úrtøkan eftir fimm umfør tvey stig. Nú bíða argjamenn eftir NSÍ. Fyri trimum árum síðani vann AB eitt stig burturúr trimum uppgerðum ímóti NSÍ.
Hjá NSÍ er vongverjin Einar Tróndargjógv leikbannaður eftir reyða kortið í steypadystinum ímóti TB.
Arnbjørn Hansen og Brian Olsen eru langtíðarskaddir hjá illa sperda EB/Streymi, sum fær vitjan av TB. Í trivaliga steypasigrinum ímóti Giza/Hoyvík fyri viku síðani var Marni Djurhuus ikki við, og vøddaskaðin er so mikið álvarssamur, at álitismaðurin í verjuni heldur ikki verður við ímóti TB. Gunnar Zachariasen fer at loysa Arnbjørn Hansen av í fremstu ódnini.
Á Tvøroyri er fótbóltslagið gott. Ikki minst eftir at tað mikukvøldið eydnaðist næstbesta liðnum at vinna 4-3 í Vági. Í bestu deildini er TB tríggjar tær seinastu ferðirnar farið av vøllinum við úrtøku. Ein av ungu monnunum, Ragnar Tausen, skoraði hattrikk í Vági, áðrenn hann í 78. minutti varð borin av vøllinum og endaði á sjúkrahúsinum á Tvøroyri. Tíbetur vístu røntgenmyndirnar at einki var brotið. Í gjár var ikki greitt, um Ragnar verður førur fyri at spæla í Streymnesi sunnudagin.
Í B36 leguni er skaðastøðan framvegis vánalig. Høgni Eysturoy er tøkur aftur, men tað er steingur oman á byrðu, at Súni Olsen nú er leikbannaður. Ungu menninir vístu mikukvøldið á Skála, at tað eru knotur í teimum.
Hjá 07 Vestur er miðvallarin Evrard Blé tøkur aftur, eftir at hann seinastu ferðirnar hevur verið leikbannaður. Tvær tær seinstu ferðirnar hevur 07 Vestur megnað javnleik ímóti NSÍ og HB. Tað ber sjálvsálit við sær, sum ikki verður skalað, hóast 07 Vestur sunnudagin tapti steypadystin á Skála.
