Tað sigur Jesper Møller við heimasíðuna hjá DBU.
Hóast Infantino í nátt tók aftur umstríddu ætlanina um at selja partar av kappingunum hjá Fifa til privatar íleggjarar, hevur tað ikki fingið álitið aftur.
– Eg eri púra samdur í, at álitið á Fifa-forsetan er horvið. Tí kann eg heldur ikki taka undir við honum, eins og vit heldur ikki gjørdu í 2023. Nú skal ein tilgongd setast í gongd, soleiðis sum Uefa eisini skrivar, og hana fara vit at stuðla. Vit fara at umrøða málið í nevndini hjá DBU, á norðurlendskum stigi og í Uefa, sigur Jesper Møller.
Hann fegnast kortini um, at Fifa hevur slept ætlanini.
– Eg eri sjálvsagt fegin um, at Fifa-forsetin hevur valt at taka uppskotið um Fifa Forward Enterprise aftur. Tað er tann rætta avgerðin – og júst sum væntað, sigur hann.
Sambært Jesper Møller stóð altjóða fótbóltur við einari avgerandi vegamótum, har nøkur av kjarnuvirðunum í ítróttinum vóru undir trýsti.
– Tá talan er um kjarnuvirðini í fótbólti, er neyðugt at reagera skjótt og greitt. Tí er tað eisini jaligt, at lurtað varð eftir teimum mongu stúringunum hjá Uefa, DBU, øðrum limasambondum og hinum heimsálvusambondunum.
– Saman hava vit víst, at evropeiskur fótbóltur stendur sterkastur, tá vit tala við einari rødd um tey grundleggjandi virðini, sum ítrótturin byggir á.
