Eitt smábarn er millum tey, sum eru dripin í russisku álopunum á ukrainska høvuðsstaðin, Kyiv, í nátt. 18 fólk eru løstað, og eldur er í fleiri bygningum, eitt nú ukrainska stjórnarbygninginum.
Borgarstjórin í Kyiv, Vitalij Klitsjko, sigur á Telegram í nátt, at eldur kom í stjórnarbygningin, eftir eitt russiskt dronuálop, sum síðan gjørdist til eitt rakettálop.
Vitnir, sum tíðindastovurnar, Reuters og AP, hava skift orð við, siga, at tjúkkur roykur eisini stóð upp úr bygningum í Petsjerskyj-økinum í býnum.
Umframt smábarnið, sum læt lív, læt eisini ein ung kvinna lív í álopunum, skrivar borgrstjórin, Vitalij Klitsjko, á Telegram.
Millum tey, sum fingu løstir í russisku álopunum og vórðu løgd inn á sjúkrahús, var eisini ein kvinna, sum var við barn.
Borgarstjórin sigur, at ein íbúðarbygningur í fleiri hæddum bleiv partvís oyðilagdur í Svjatosjynskyj-økinum, og leivdir frá dronum festu eisini eld í aðrar stórar íbúðarbygningar.
Men, tað var ikki bara ukrainski høvuðsstaðurin, sum varð raktur í russisku álopunum í nátt.
Aðrir býir vórðu eisini raktir, og fleiri spreingingar vóru í Krementsjuk, har streymurin fór í pørtum av býnum. Hetta upplýsir borgarstjórin í býnum, Vitalij Maletskyj.
Í syðra parti av Ukraina varð eisini havnarbýurin, Odessa, raktur. Odessa liggur við Svartahavið.
- Íbúðarbygningar vórðu raktir, og eldur kom í fleiri bygningar, sigur guvernøurin í Odessa-økinum, Oleh Kiper.
