Gjáramorgunin fekk løgreglan eina fráboðan úr Vágum um, at fólk, sum vóru farin ein túr í hagan, høvdu funnið eina granat.
- Vit settu okkum í samband við Arktisk Kommando, sum tekur sær av slíkum málum, og vit hava skilt, at hetta er ein granat frá seinna heimsbardaga.
Vaktleiðarin á løgreglustøðini í Havn sigur í morgun, at sambært tí, sum fann granatina, lá hon ikki á slíkum staði, har fólk vanliga gongur.
- Vit skiltu, at granatin varð funnin einar tveir kilometrar frá flogvøllinum í Vágum.
Krígssavnið liggur beint omanfyri landsvegin við flogvøllin, og tískil hevur henda ganatin eftir øllum at døma ligið nærindis Krígssavninum síðan seinna heimsbardaga.
- Vit vita ikki meira um granatina, og tað kann vera, at Arktisk Kommando longu hevur verið á staðnum.
Vaktleiðarin legði aftrat, at sambært manninum, sum fann granatina, liggur hon soleiðis fyri, at hon ikki er til ampa fyri gongufólk ella onnur um hesar leiðir.