Harðskapur móti kvinnum og gentum er ein "tjóðarkreppa" í Bretlandi, har umleið 3.000 slík brotsverk verða skrásett hvønn dag.
Tað stendur í nýggjari frágreiðing á økinum, skrivar tíðindastovan dpa.
Frá apríl 2022 til mars 2023 kundi løgreglan soleiðis skráseta eina millión brotsverk framd móti kvinnum og gentum, stendur í frágreiðingini.
Frágreiðingin er umbiðin av landsfelagnum fyri yvirkonstablar, NPCC, og College of Policing, sum er ein stovnur fyri øll tey, sum arbeiða í løgregluni í Onglandi og Wales.
Í frágreiðingini, sum hevur heitið "Yvirlýsingin hjá landsløgregluni um harðskap móti kvinnum og gentum", sæst, at brotsverk móti kvinnum eru næstan 20 prosent av øllum brotsverkum, sum eru meldað til løgregluna - umframt svik - framd millum apríl 2022 og mars 2023.
Mett verður í frágreiðingini, at á hvørjum ári verður umleið 1 av 12 kvinnum offur fyri harðskapi. Hetta svarar til tvær milliónir kvinnur.
Væntað verður tó, at veruliga lutfallið er munandi hægri orsakað av einum munandi tali í myrkri.
Maggie Blyth, sum er varakonstabul í bretsku løgregluni, heitir á stjórnina um at blanda seg uppí frágreiðingina.
- Okkum tørvar stuðul og leiðbeining frá stjórnini at grípa inn og fáast við verandi trupulleikar í rættarskipanini. Harðskapur móti kvinnum og gentum er ein tjóðarkreppa.
Tá talan er um talið av gerningsmonnum, so metir frágreiðingin, at 1 av 20 vaksnum fremur harðskap móti kvinnum og gentum á hvørjum ári. Hetta svarar til 2,3 milliónir fólk.
Aftur her verður tó væntandi eitt veruligt myrkatal.
Handtøkurnar fyri harðskap í húskinum vuksu við meira enn 22 prosentum frá apríl 2022 til mars 2023, samanborið við undanfarna tíðarskeið.
Samstundis var sætta hvørt dráp, sum varð framt í tíðarskeiðnum, tengt at harðskapi í húskinum.
Maggie Blyth sigur, at bretska samfelagið skal "hyggja frameftir" og "ikki longur góðtaka harðskap móti kvinnum og gentum sum nakað, sum ikki slepst undan".
/ritzau/
