Fert tú á ólavsøku í ár?
- Ja, tað fari eg. Eg haldi, at eg bara einaferð hesi seksti árini havi verið uttanlands á ólavsøku, og tað føldist eitt sindur løgið ikki at vera heima.
Tað sigur Elin Heðinsdóttir Joensen.
Hvat heldur tú er tað besta við tjóðarhátíðini?
- Alt! Setanin, kappróðurin og øll tiltøkini annars – og ikki minst at síggja øll fólkini í føroyskum klæðum, sum eg haldi er so flott, serliga tí búnarnir eru so ymiskir í liti.
Er okkurt, tú saknar við ólavsøkuni?
- Tað er so nógv at fara til, at tað haldi eg ikki.
Elin heldur tó, at kanska kundi tað verið meira til børn og barnafamiljur.
- Men, tað eru barnatiltøk til allar festivalar, so kanska tørvurin ikki er so stórur akkurát á ólavsøku.
Minnist tú onkra ólavsøku fram um aðrar?
- At halda ólavsøkurøðuna í 2017 var nakað heilt serligt og ikki minst ein heiður at verða biðin at halda røðuna, sigur Elin Heðinsdóttir Joensen.
