Heini Vatnsdal: Nýggi motorurin á HB liðnum

HB - Víkingur 3-0

- - -

HB er nýtt oddalið í Effo-deild­ini. Tað er greitt, eftir at teir í gjár vunnu 3-0 á Víkingi, sum undan dystinum sat á fyrsta plássinum.
Lykilin lá í slagnum um miðvøllin, har HB hevði Heina Vatnsdal, Fróða Benjaminsen og Kristin R. Mouritsen, með­an Símun Samuelsen og Christian R. Mouritsen vóru á kantunum.
Mótspælið hjá Víkingi var Niclas Niclassen, Hans Jørgen Djurhuus og Jann Ingi Petersen. Niclas og Hans Jørgen á verjukenda mið­vøll­inum, og Jann Ingi longur frammi á vøllinum.
Í verjustøðu megnaði Víking­ur í fyrra hálvleiki fyri tað mesta at standa ímóti, men í framrættaða spæl­inum riggaði ikki. Serliga tí Heini Vatnsdal og Fróði Benjamin­sen stóðu sum ein blokkur framman­fyri verjuni.
Miðskieðis í fyrra hálvleiki legði Heini Vatnsdal HB á odda eftir hornaspark. Stutt fyri hálvleik økti Christian R. Mouritsen, og tíggju min­uttir inn í seinna hálvleik stað­festi Andrew av Fløtum dystin við drønskoti til 3-0. Restina av dystinum hevði HB tamarhald á støðuni.
Eitt korter fyri tíð fekk mál­verjin hjá Víkingi, Geza Turi, beinleiðis reytt. Víkingur hevði brúkt allar út­skift­ingarnar og tí mátti Hjartvard Hansen fara í mál seinasta korterið. HB skifti fleiri fólk og tók sær av løtt­um restina av dystinum.

Nýggi mortorurin trívist í HB
Heini Vatnsdal flutti í vetur til HB frá FC Suðuroy. Hann hevur leingi verið mett­ur sum eitt risa talent í før­oyskum fótbólti. Hann hev­ur spælt seks dystir á U21 lands­liðnum og nærkast nú hálvt­hundrað í Effo-deildini, men manglar veruliga at sláa sítt navn fast í føroyskum fót­bólti. Hann hevur spælt við FC Suðuroy, sum er flutt niður bæði árini hann hevur spælt við teimum í bestu deild­ini. Serliga í fjør gekk illa hjá FC Suðuroy, og tá er ringt at meta um evnini hjá einum spælara, tá liðið er so lítið kappingarført, sum FC Suðuroy vóru farna kapp­ingarár.
– Eg vildi royna okkurt nýtt, serliga tí FC Suðuroy flutti niður. HB vísti stóran áhuga fyri at fáa meg, tí valdi eg at skifta, greiður Heini Vatnsdal frá eftir dystin í gjár.
Heini er málrættaður og tekur fótbóltin í álvara. Hann er komin til HB fyri at menna seg sum fótbóltsspælara og hann trívist í leiklutinum sum oddalið í føroyskum fót­bólti.
– Tað hevur verið heilt fan­tastiskt at koma til HB. Eg hevði ikki væntað, at um­støðurnar vóru so góðar sum tær eru. Her er alt og tú fær tað, sum tú hevur brúk fyri, og hópurin er fantastiskur. Hetta er nokk tað besta tú kann koma til í Føroyum, sig­ur nýggi motorurin á mið­vøll­inum hjá HB.
Tey fyrstu trý umførini mátti Heini hyggja at, með­an hinir spældu, tí hann hevði leikbann frá farna kapp­ingar­ári.
– Tað var strævið. Eg havi eisini roynt tað fyrr og eg havi eisini sitið nógv uttan­fyri við skaða. Tað er ringt at sita uttanfyri og bara hyggja at, men tað var tríggjar dystir og nú er tað so farið, so tað er gott at verða við, sigur Heini, sum nú er komin til eitt felag har meistaraheitið er eitt mál at kall hvør kappingarár.
– Tað er tað sum eg vil. Tú spælir fótbólt fyri at vinna og tað gera vit til hvønn dyst. Mær dámar eisini væl mátan vit spæla uppá, men tú skal venja teg við tað. Millum ann­að er leikferðin hægri, greið­ur Heini frá, meðan lið­felagir­nir ein fyri og annar eftir kom upp trappurnar í HB húsinum og antin hála í buksurnar ella klípa vábingin í bak­partin.
Kropsliga er Heini væl fyri, men ásannar, at orkan ikki er í topp, nú so stutt er farið av kappingini. Hóast hann er stórur og kropsliga væl fyri, so hevur hann góðan bóltførleika og stendur seg væl í avleveringsspælinum.
– Eg haldi eg klári at spæla við í tí skjóta spælinum sjálvt um eg eri størri og tyngri enn nakrir av hinum, sigur Heini og kallar Fróða Benjaminsen fyri »Captain Fantastic«, tá prát­ið fellur inn á landsliðs og HB-liðskiparanum, sum Heini spælir undir liðini á. Er tað upp til Heina, so ætlar hann sær eisini koma á lands­liðið eins og síðu­maður­in í HB.
– Eg ætli mær á landsliðið. Spælir tú fótbólt seriøst, so haldi eg at tú mást royna at koma á landsliðið. Vónandi eydn­ast tað, um eg klári meg væl og verið skaðafríur, legg­ur Heini afturat at enda.

Spakir víkingar
Tað var lítið av villskapi at síggja í annars ágrýtnu víking­inum í Gundadali. Okk­urt hissini sprell var á vengr­unum, men fyri utt­an tað, so var lítið veiggj í steypa­vinn­ar­unum úr Leirvík og Gøtu.
Jógvan Martin Olsen, venj­arin hjá Víkingi, var fá­orð­aður eftir dystin og ásannaði bara, at hetta var als ikki gott nokk. Hann harmaðist eisini um, at spælararnir, sum komu inn í seinna hálvleiki, ikki fingu møguleikan at vísa hvør dugur er í teimum. Hetta tí Geza Turi fekk bein­leiðis reytt kort og tí mátti Hjartvard Hansen verja mál­ið, tí Víkingur hevði onga út­skift­ing eftir.
Fyri Víking er hetta annar dysturin í ár, har teir hava tapt greitt. Hin dysturin var eis­ini í Gundadali, tá móti B36. Hetta er ikki nóg gott fyri eitt lið, sum skal kempa í odd­inum, men heldur Víkingur fram at vinna allar sínar heimadystir, og lærir av dyst­unum í Gundadali, so hava leirvíkingar og gøtu­menn ikki so nógv at hóttast. Men fleiri avrik sum tey í gjár, so kann tað skjótt gerast minni hugaligt at verða ljósa­bláur.

Geza beinleiðis reytt
Ungverki málverjin hjá Víkingi, Geza Turi, hevur ikki roynt at verið útvístur fyri Víking fyrr, men eitt korter fyri tíð fekk hann bein­leiðis reytt kort. Tað var ikki til at síggja hvat hendi, men í samband við horna­sparks­støðu gav Rúni Gaardbo málverjanum reytt kort fyri, sum skilst, at hava stúta til Andrew av Fløtum, sum tó ikki fekk mein av hend­ingini.
Jógvan Martin Olsen vátt­aði eftir dystin fyri Rás2, at hann hevði tosað við Geza, sum segði seg verða ósekan í nøkrum líknandi atburði.

Nú vísur HB kulør
HB hevur meldað í FM, og sigurin í gjár vísti, at hóast liðið seinast bara fekk eitt stig móti einum væl­kemp­andi 07 Vestur liðið, so hevur høvðusstaðarfelagið fatur á rætta endanum. Heini Vatnsdal kann vísa seg at gerast lykilin til eina dynamiska og sterka miðju, saman við Fróða Benjamin­sen, og so antin Kristini R. Mouritsen ella Bárði Olsen. Í álopinum spældi Andrew av Fløtum sum ein unglingi, meðan verj­an enn eina ferð megnaði at halda mót­støðu­lið­num frá at skjóta mál.
Teir reyðu og svørtu hava nú hildi málið reint í 420 minuttir. HB hevur bestu verj­una í landinum um hugt verður eftir tølunum. Bara tvey mál eru komin ígjøgnum. Tey bæði málini komu í 1. og 2. um­fari móti ávíkavist B36 og AB. Síðani er ikki skorað móti HB í áleið 420 minuttir í Effo-deildini.
Hetta var ein sigur, sum vísur at HB hevur tað, ið skal til fyri at vinna FM. Komandi upp­gáv­an er í Klaksvík móti KÍ, ið helst kundi hugs­að sær at fingið eitt mál ella tvey. Teir eru mest skor­aði liðið í deildini og hava numm­ar eitt og tvey á topp­skoraralistanum, meðan HB hevur bestu verjuna.
Eitt satt oddbrak millum risar!
- - -

Símun Samuelsen um Heina Vatnsdal:
– Heini er ein spælari við nógvum styrkjum og fáum veikleikum. Hann er sterkur í luftspælinum og tað sært tú bæði við 1-0 málið, og hvørja ferð tað er málspark, so er hann hægstur. Hann hevur eitt ótrúliga gott »drive«. Tað sær kanska ikki soleiðis út, men tað eru fáir, ið taka hann í ferð, tá tað fyrst sleppur avstað. Sjálvt um tú ikki hugsar tað tá tú sær hann, so er hann næstan tann skjótasti á liðnum.
– Hann líkist Fróða Benjaminsen á tann hátt, at hann er góður til bæði tað verjukenda og tað framrættaða spælið. Hann luttekur í spæl­inum í báðum endum og orkar at gera tað.
– Hann hevur eisini eitt evni til at taka rættar av­gerðir við bóltinum. Ikki tí hann velur tað løttu a­vgerðina, tí hann torir eisini at satsa við bólt­inum, men tað eydnast sum oftast.
– Tað er ein spælari, sum eg eri glaður fyri at hava á liðnum. Við honum og Fróða á miðvøllinum, so verður tað torført hjá øðrum at bróta ígjøgnum. Hugsi eisini um, tá vit spæla á útivølli.
– Tað er ongin ivi um, at hann er ein komandi lands­liðsspælari. Hann hevur alt, sum skal til fyri at spæla altjóða fótbólt, sigur Símun Samuelsen at enda um Heina Vatnsdal.