Seinastu tíðina hava fleiri kommunur kring landið kunnað um, at tær nú fara at taka gjald fyri tóm býli - ella hús - har eingin er skrásettur at búgva.
Gjaldið verður ásett sambært løgtingslóg nr. 80 frá 2. mai 2025.
Á bygdaráðsfundi í Hvalbiar kommunu hin 12. desember í fjør samtykti bygdaráðið at áseta tænastugjald á tóm býli sambært nevndu løgtingslóg.
- Við gildi frá 1. januar í ár verður gjaldið 7.945 krónur árliga, sum er hægst loyvda gjald fyri 2026, siga tey í Hvalbiar kommunu.
Sagt verður, at eftir ætlan kommununar verður gjaldið kravt inn einaferð um árið.
- Vit fara at senda rokning til eigarar av býlum, har eingin er skrásettur at búgva sambært Landsfólkayvirlitinum, siga tey í Hvalbiar kommunu.
