Sambært Kringvarpinum hava flestu kommunur sett ein integratiónssamskipara, meðan aðrar hava valt at samstarva um starvið. Men í Sands-, Nes-, Sjóvar-, Sunda- og Eiðis kommunu er eingin beinleiðis integratiónssamskipari settur enn.
Í Nes kommunu hevur kommunustjórin, Elsbet Ellingsgaard Magnussen, fyribils átikið sær uppgávuna aftrat kommunustjórastarvinum. Í Sjóvar og Sunda kommunu røkja verandi trivnaðarfólk eisini uppgávuna, meðan Eiðis kommuna hevur sett ein tímaløntan integratiónssamskipara. Einasta økið, har eingin skipan enn er komin í lag, er Sandoyggin, har arbeitt verður við málinum.
Kringvarpið vísir eisini á, at sjey kommunur í Norðoyggjum og Eysturoynni hava valt at samstarva um eina felags skipan. Har byrjaði Sóley Sjúrðaberg í starvinum sum integratiónssamskipari 1. mai og røkir uppgávuna fyri Klaksvíkar, Fuglafjarðar, Eystur-, Kunoyar-, Hvannasunds-, Viðareiðis- og Fugloyar kommunu.
