- Starvsfólk á Værnes-flogvøllinum í Noregi hava funnið ein illgrunasaman lut í viðførinum á flogvøllinum.
Tað skrivar norska løgreglan, sum er á staðnum og ger kanningar.
Átaksleiðarin hjá løgregluni, Einar Røstum, sigur, at fólk í tí eina terminalinum eru flutt burtur, meðan málið verður kannað.
Avinor sigur, at tað verða seinkingar í flogferðsluni út á seinnapartin, tí flogfør mugu bíða, og fólk eru flutt burtur.
- Vit vænta seinkingar bæði við komum og fráferðum, sigur Carita Storm Røsaasen i Avinor.
Millum norsku miðlarnar, sum bera hesi tíðindi tíðliga seinnapartin í dag, eru eitt nú tv2.no og norska kringvarpið, NRK.
Dagføring:
Tað seinasta nýggja er, at norska løgreglan nú hevur kannað viðførið, sum illgruni var um.
- Kanningin vísir, at einki spreingievni er í viðførinum, veit norska løgreglan at siga.
