Har var í gjár tosað um avrikini hjá Edmundi Joensen –?hetta at fáa pengar úr Danmark til Føroya.
Edmund Joesen sigur í lesarabrævi í dag, at:
»Eirikur Lindenskov, Johan Mortensen og Sveinur Tróndarson royna seg í hesum døgum sum politiskir smaksdómarar í Kringvarpinum í sambandi við Fólkatingsvalið.
Teir tríggir vóru í tíðindasending í kvøld (týskvøld) samdir um, at Edmund Joensen er okkurt slag av »jólamanni«, sum »sýgur« pengar úr donskum kassum og dregur teir heim til Føroya at býta út.
Hetta er eitt typiskt sjálvstýris- ella fullveldissjónarmið. Eg eri púra ósamdur við hesar politisku smaksdómarar.«
Edmund Joensen vísir á, at »hetta gera tey í øðrum londum fyri at fasthalda ung í landinum. Endamálið er somuleiðis at fasthalda og skapa nýggj vinnulig arbeiðspláss.
Soleiðis verður arbeitt aðrastaðni fyri at skapa fólkavøkstur og búskaparvøkstur, sum vit eisini hava so nógv brúk fyri í Føroyum. Hetta eiga vit eisini at gera.
Hetta ljóðar alt so skilagott. Men er tað nú orsøkin til, at vit velja tvey umboð í danska Fólkatingið? Átti tað ikki at verið eitt hægri politiskt endamál, enn at ein breyðpolitikari kann seta mál fyri mál á sín avrikslista og brúka tað til at verða valdur aftur – sum vælgøddur breyðpolitikari?
– Kanska vit skuldu limað okkum inn í ES gjøgnum Danmark – og fingið sum Grønland fekk – eitt umboð í ES-parlamentið. Hvat kundu vit ikki drigið heim av jólagávum hagani?
Men Edmund! Skjót bara allar journalistarnar – í øllum førum um teir eru fullveldismenn!
