Landsstýrið lýsir búskaparstøðuna í Føroyum sum góða.
Í ólavsøkufrágreiðingini verður víst á, at vøkstur er í búskapinum, nettotilflytingin er positiv, arbeiðsloysið er nærum burtur, og talið á starvsfólkum hevur ongantíð verið hægri.
Sambært metingunum hjá Fíggjarmálaráðnum fer føroyski búskapurin at vaksa við millum fýra og fimm prosent bæði í ár og komandi ár. Men nógv veldst um gongdina uttanlands.
Millum annað verður peikað á, at ófriðurin í Miðeystri, oljuprísirnir, rentustøðið og altjóða búskapurin kunnu fáa stóra ávirkan á føroyska búskapin komandi árini.
Kortini er tað serliga ein avbjóðing, sum fyllir í frágreiðingini.
– Størsta avbjóðingin í búskapinum er haldførið í almenna búskapinum, verður staðfest.
Tí ætlar samgongan at halda fast um ein ábyrgdarfullan fíggjarpolitikk og samstundis gera íløgur, sum kunnu styrkja samfelagið upp á longri sikt.
