Leicester er flúgvandi – Chelsea nærkast kreppu

Tveir dystir vóru í Premier League í gjár. Leicester City legði seg fyribils á oddasessin við 2-0 sigri á Chelsea, sum nærkast eini kreppu. Í London er David Moyes við at fáa skil upp á West Ham, sum vann 2-1 á West Bromwich.

Tað eru fimm ár síðani, at Leicester City púra óvæntað vann Premier League. Nú eru teir aftur nummar eitt, so spurningurin er um søgan er við at endurtaka seg? Leicester vann 2-0 á heimavølli móti Chelsea.

Wilfred Ndidi og James Maddison skoraðu málini. James Maddison økti til 2-0 fýra minuttir fyri hálvleik, eftir at Chelsea hevði fingið brotsspark, men VAR umdoypti dómin til fríspark á brotssteigarmarkinum. Heimaliðið var leikliga omaná og tóktist orkuríkt.

Chelsea er nú á áttanda plássi og fleiri byrjar at seta spurnartekin við venjaran, Frank Lampard. Hann keypti í summar spælarar sum Kai Havertz (Bayer Leverkusen), Ben Chilwell (Leicester City), Timo Werner (RB Leipzig), Hakim Ziyech (Ajax), Edouard Mendy (Rennes) og Thiago Silva (PSG) fyri beint undir tvær milliardir krónur.

Skil er við at koma upp á West Ham. Við 2-1 sigri á West Bromwich er West Ham nú á sjeynda plássi. Málini skoraðu Jarrod Bowen og Michail Antonio. Í kvøld verða tveir dystir. Manchester City tekur á heimavølli móti Aston Villa, meðan Manchester United er á vitjan hjá Fulham, sum liggur undir niðurflytingarstrikuni.