- Ein partur av Leitisvegi verður nú gjørdur av nýggjum og breiðkaður fyri at betra um ferðslutrygdina og gera vegin hóskandi til dagsins ferðslu.
Í Vestmanna kommunu siga tey, at Leitisvegur er ein av elstu vegunum í bygdini. Hann varð upprunaliga gjørdur til hestavognar og lagdur omaná eyr og mold.
- Hóast fleiri hava búsett seg á Leiti gjøgnum árini, og nógv virksemi hevur verið í sambandi við bæði vatnorku og vindorku, er vegurin ongantíð gjørdur niður á fast undirlag, so hann er egnaður til bilferðslu og tyngri ferðslu.
Vegurin er tískil í sera ringum standi og hevur leingi havt tørv á ábøtum.
- Í fyrstu syftu verður arbeitt á strekkinum frá Leitisvegi 15 og tvørtur um ánna við Leitisveg 9. Samstundis verður vegurin breiðkaður í ovara borði, so hann verður tvísporaður.
Í Vestmanna kommunu sigaa tey, at arbeiðið er farið í gongd og fer væntandi at taka einar tveir mánaðir.
- Meðan arbeitt verður í dagtímunum, er Leitisvegur stongdur fyri óviðkomandi ferðslu, og bert íbúgvar á Leitisvegi og onnur, ið hava neyðug ørindi í økinum, kunnu brúka vegin, verður lagt aftrat.
