At árið 2022 var metár fyri kriminalitet á Svalbard, ljóðar kanska eitt sindur ógvusligt.
Men, størsti parturin av málunum snúðu seg um umhvørviskriminalitet, sum tað verður rópt.
- Talan hevur ikki verið um nøkur sera álvarslig mál, sigur sýslumeistarin á Svalbard, Lars Fause.
Í tíðindaskrivi, sum Svalbardposturin endurgevur, verður sagt, at størstu tølini fyri revsimál, síðan skrásetingin byrjaði í ár 2000, vóru í fjør.
Flestu málini snúðu seg um umhvørviskriminalitet. Her øktist talið árini 2021 til 2022 úr átta revsimálum í 2021 til 41 mál í 2022.
Næst flestu revsimálini snúðu seg um brot á ferðslureglur. Her vóru bara seks slík mál í 2021 - og 26 í 2022.
Sýslumeistarin heldur, at vøksturin í revsimálum hongur eitt sindur saman við øktari nærveru hjá løgregluni og meira málrættaðari umsjón við oyggjabólkinum.
- Miðvísa arbeiði fer at halda fram í 2023, og vónin er, at færri og færri lógir og reglur verða brotnar á Svalbard, sum tíðin gongur, sigur Lars Fause.