Tað eru lítið hugalig tíðindi, sum HB borðreiðir við í morgun. Álitismaðurin á miðvøllinum bæði í fjør og í ár hevur verið Noah Mnenéy, men hann verður ikki á HB liðnum næstu vikurnar.
HB skrivar soleiðis:
Noah brotið beinið
Í dystinum ímóti B68 kom Noah illa fyri. Hann var skiftur út, og røntgenkanningar vísa, at hann hevur fingið eitt brot á høgra bein, beint undir knænum.
Hann skal binda frið komandi vikurnar, áðrenn endurvenjingin fer í gongd.
Noah var stuðlaður av vøllinum av liðfeløgum og hjálparfólkum eftir nærdyst, sum kostaði Sebastian Lau Nielsen hjá B68 reytt kort fyri takling inn á fótliðin.
Noah Mnenéy hevur seinastu tíðina verið fastur maður í landsliðshópinum. Nú verður hann ikki tøkur, tá ið Eyðun Klakstein seinni í hesum mánaðinum fer at úttaka landsliðshópin.
