Hóast CO2-krøvini til bilframleiðslu í ES eru útsett, so er sølan av elbilum vaksandi á øllum ES-marknaðunum, har fimti hvør nýskrásettur bilur í november er elbilur.
Tað skrivar Mobilitet Danmark í tíðindaskrivi.
Í november vóru 887.491 nýggir persónbilar skrásettir á ES-bilamarknaðunum. Tað svarar til ein lítlan vøkstur á 2,1 prosent í mun til sama mánað í fjør, og november var sostatt enn ein mánaður við vøkstri í talinum av nýggjum skrásetingum í ES. Higartil í ár eru 9.860.092 nýggir persónbilar skrásettir í ES, sum er støðugt í mun til støðið frá 2024, við einum lítlum vøkstri uppá 1,4 prosent.
"Tað hevur verið ein góð og støðug gongd í ES-bilsøluni seinastu mánaðirnar, og tað sær út til, at tað verður eitt ordiliga gott úrslit fyri árið. Bilídnaðurin er partur av kjarnuni í arbeiðsmarknaðinum og búskapinum í ES, og vit fylgja sjálvandi væl við evropiska marknaðinum í seinasta spurtinum móti 2026," sigur Mads Rørvig, stjóri í Mobility Denmark.
Nýggj krøv til bilídnaðin
Elbilar vóru eisini eyðkendir av framgongdini í november. Í mánaðinum vórðu 188.730 el-persónbilar skrásettir, sum er ein vøkstur uppá 44,1 prosent í mun til november 2024. Elbilar vóru sostatt 21,3 prosent av ES-marknaðinum í november – tað er meira enn ein av fimm nýggjum bilum.
Menningin av elbilum í ES er millum annað myndað av tjóðarkrøvum og rammutreytunum hjá ES, og tann 16. desember 2025 lagaði ES-nevndin krøvini til bilídnaðin í einum nýggjum "Automotive Package". Í pakkanum er ein slakan av málinum fyri 2035. Áður var málið at steðga heilt framleiðsluni av nýggjum bilum við fossilum brennievni, meðan nýggja málið er at minka um CO2-útlátið hjá bilunum, meðan koyrt verður, við 90 prosentum. Samstundis eru í pakkanum eisini uppskot til tjóðarmál fyri útbreiðslu av null- og lágútlátsakførum.
"ES-nevndin setur karmarnar, men leiðin móti elbilum er framvegis greið. Nýggi pakkin skapar størri týdning fyri framleiðarar og leggur dent á tørvin á tjóðarátøkum, sum kunnu halda elektrifiseringini í gongd. Hetta er avgerandi fyri, at grøna umleggingin ikki missir ferðina," sigur stjórin í Mobility Denmark í tíðindaskrivinum.
##med2##
##med3##
##med4##
