Forsetin í Hvítarusslandi, Aleksandr Lukasjenko, sigur, at Wagner-leiðarin, Jevgenij Prigozjin, er í St. Pætursborg í Russlandi.
- Prigozjin er ikki í Hvítarusslandi. Hann er í St. Pætursborg. Kanska fór hann til Moskva, men hann er í øllum førum ikki í Hvítarusslandi.
Tað sigur Aleksandr Lukasjenko sambært Reuters.
Og hann leggur aftrat:
- Prigozjin er ein frælsur maður. Putin vil ikki gera av við hann. Putin og eg skulu umrøða Prigozjin á einum fundi.
Aleksandr Lukasjenko sigur, at tilboðið hjá Wagner-leiðaranum um at hava nakað av sínum herfólki í Hvítarusslandi stendur við.
Sambært forsetanum er spurningurin um, hvar Wagner-leiðarin skal hava síni herfólk í Hvítarusslandi framvegis ikki loystur.
- Eg vænti ikki, at Wagner-herlið nakrantíð fara at brúka vápn móti Hvítarusslandi, sigur Aleksandr Lukasjenko.
Í aðrar mátar sigur forsetin, at hann væntar, at Ukraina fer at gera okkurt "álvarsligt" á hermótinum, nú Nato-toppfundurin verður í Vilnius í næstu viku.
- Men, tað fer at oyðileggja egnan hernaðarkapasitet, um Ukraina fer at brúka síni bestu herlið í hesi royndini, sigur Aleksandr Lukasjenko.
Forsetin í Hvítarusslandi sigur, at hann bjóðar Ukraina og Russlandi at byrja friðarsamrøður í stríðnum, sum er í Ukraina.
