Rebekka Fuglø kappaðist serliga við Karinu Klok í bólkinum gentur 18-19 ár á 1500 metrum. Tilmeldingartíðirnar boðaðu frá frammanundan, at talan fór helst at vera um tætta kapping. Rebekka legði varliga fyri og rann fyrstu 100 metrarnar upp á 18,5 sekund. Hon setti spakuliga ferðina upp, men Simone Glad, sum hevði bestu tilmeldingartíðina, fór frá øllum, og Karine Klok var nummar tvey. Rebekka var beint aftan fyri, men setti ferðina upp seinastu metrarnar. Seinastu trý umførini økti hon um munin aftur til hinar. Tíðin hjá henni var 4.49.21, og tað er nýtt persónligt met. Tíðin hjá Karinu Klok, sum varð nummar tvey, var 4.59.31.
Eisini á 800 metrum
Rebekka Fuglø vann eisini danmarksmeistaraheitið á 800 metrum. Tað var leygardagin. Tað vóru bara tvær, sum høvdu meldað seg til í bólkinum gentur 18-19 ár, og tí runnu tær saman við teimum 20-22 ár. Rebekka Fuglø kappaðist móti Karinu Klok, sum rann aftaná føroyinginum so at siga allatíðina.
Tíðin hjá Rebekku var 2,26.18.
Marnar stóð seg væl
Eisini Marnar Djurhuus stóð seg væl. Hann var triðjur á málið leygardagin í bólkinum 3000 metrar í dreingir 17. Marnar var við millum teir ovastu beinanvegin, men favoritturin Zacharias Grassme, Sparta, fór undan hinum, tá helmingurin var runnin. Marnar dragnaði og hótti ongantíð teir ovastu. Hann kom á málið við tíðini 8,57.35, og vann bronsuheiðursmerki.
Marnar var nummar fýra í kappingini 1500 metrar fyri dreingir 17 í gjár.
Tað var triðju árið upp í slag, at íðkarar úr Treysti er við til danmarksmeistarakappingina fyri ung. Fyri at sleppa við til DM krevst, at tú umboðar eitt danskt felag, og at tú er millum 18 tey fremstu á ranglistanum í tínum aldursbólkin.
– Hetta er sera gott høvi hjá okkara bestu ungu íðkarum at royna seg móti javngomlum rennarum úr Danmark, skrivar heimasíðan hjá Treystinum.
