Ein russiskur hermaður er farin um markið til Norðurnoreg og søkt um friðskjól har.
Tað váttaði verjin hjá hermanninum fyri norska miðlinum Dagbladet leygardagin.
- Hann hevur søkt um friðskjól, og eg rokni við, at hann fer ígjøgnum eina vanliga friðskjóltilgongd, sigur verjin, Trond Biti, við Dagbladet.
Maðurin hevur eftir øllum at døma greitt frá, at hann var ein russiskur hermaður, sum bardist í Ukraina, men ikki longur vildi luttaka í krígnum.
Noreg hevur nærum 200 kilometrar av landmarki við Russland.
Sambært verjanum fór hermaðurin við einum hýruvogni til marknaøkið og gekk síðani seinasta teinin.
Russarin hevur verið avhoyrdur og skal hava viðgingið, at hann ólógliga fór um markið til Noregs við Grense Jakobselv, sum er eitt øki í útnyrðingspartinum av Noregi beint við markið.
Løgreglan váttar upplýsingarnar frá verjanum:
- Viðkomandi hevur biðið um verju umvegis Asylstovnin, og Finnmark Politidistrikt fer tí at flyta málið til innflytaradeildina hjá løgregluni til nærri eftirfylgjan, stendur í løgreglufrágreiðingini.
Maðurin varð tikin fríggjadagin eftir at hava gingið yvir um markið. Norskir marknavørðar, sum eru partur av herinum og hava eftirlit við markinum, sóu hann og boðaðu løgregluni frá.
Undir krígnum hava fráboðanir verið um, at túsundtals russiskir hermenn hava roynt at sleppa undan at vera í russiska herinum.
Eisini eru ávís mál, har nógv fjølmiðlaurøða hevur verið, har hermenn hava søkt um friðskjól í øðrum londum.
Til dømis er tað fyrrverandi Wagner-yvirmaðurin Andrei Medvedev, sum í 2024 fekk friðskjólsumsókn sína í Noregi avvísta, men framvegis fekk loyvi at vera verandi í landinum.
Eisini fingu seks russiskir hermenn, sum flýddu undan Ukrainakrígnum, fyribils uppihaldsloyvi í Fraklandi í oktober 2024, meðan teir kundu søkja um friðskjól.
/Ritzau/NTB
