Sólin stavar niður á Strendur í dag, og har er kappróðrarlagið sera gott.
Strálan hevur í nógvar vikur og mánaðir vant, og fyrr í ár hevur tað onkra ferðina sæð gott út, men í trimum teimum fyrstu kappingunum er tað ikki eydnast at vinna.
Men í dag vunnu strandingar. Strálan var í støðugari kapping við Froðbing, meðan tað ikki av álvara bar til hjá Smyrli úr Vági, sum annars var so knáur fyrr í summar.
Endaspurturin millum Stráluna og Froðbing var so sera spennandi. Eina lítla løtu sá tað út til, at strandingar aftur í dag fóru at missa á stokkinum, men so svaraði Strálan aftur og var eitt vet undan Froðbingi um málstrikuna, meðan Smyril var eina stóra bátslongd aftari.
Sambært Jan Herman Hansen, sum í dag er viðmerkjari í Kringvarpinum, og sum áður hevur verið formaður í RSF og annars er róðrarkønur, so eru tað 21 ár síðani, at Strálan av Strondum síðst vann ein kappróður, og tað var eisini í Miðvági, at menninir av Strondum vunnu.
Í FM kappingini er tað nú púra javnt millum suðuroyarbátarnar Froðbing og Smyril.
| 1 | Strálan (Strálan) | 04:42.18 | +00.00 | 7 | ||
| 2 | Froðbingur (FSR) | 04:42.39 | +00.42 | 6 | ||
| 3 | Smyril (VK) | 04:45.11 | +02.86 | 5 | ||
| 4 | Skúgvur (SÍF) | 04:50.26 | +08.16 | 4 | ||
| 5 | Kvívíksbáturin (KSR) | 05:00.00 | +17.64 | 3 | ||
| 6 | Víkingur (HR) | 05:13.05 | +30.74 | 2 |
| 1 | Froðbingur (FSR) | 5 | 31 | ||
| 2 | Smyril (VK) | 5 | 31 | ||
| 3 | Strálan (Strálan) | 5 | 23 | ||
| 4 | Skúgvur (SÍF) | 5 | 20 | ||
| 5 | Sundabáturin (NHR) | 4 | 17 | ||
| 6 | Kvívíksbáturin (KSR) | 5 | 10 | ||
| 7 | Víkingur (HR) | 5 | 7 |
rsf.fo
