Magni Højgaard vil hava landsstýrismannin at greiða frá, hvørjar ítøkiligar ætlanir eru um at asfaltera og umvæla vegir í Eysturoynni, harundir á Skála.

Hann spyr eisini, hvussu arbeiðini verða raðfest, nú trýstið er stórt og eitt munandi eftirsleip er á økinum.

Í viðmerkingunum til fyrispurningin vísir løgtingsmaðurin á tvey stutt vegastrekki á Skála. Tilsamans eru tey undir tveir kilometrar, men sambært honum hava tey stóran týdning fyri ferðsluna í bygdini.

Annað strekkið gongur frá avkoyringini á Ovaravegi oman fyri skipasmiðjuna og oman gjøgnum Skála.

– Har er vegurin í sera ringum standi, so leingi tað er landsvegur. Ein sera stórur partur av ferðsluni í bygdini kemur og fer hendaveg, skrivar Magni Højgaard.

Hann vísir millum annað á nógvu bilarnar, sum koyra til ítróttarøkið undir Mýruhjalla, og alla ferðsluna oman á vinnuøkið.

Hitt strekkið er uttasti parturin av Skálavegi, frá Gjógvará beint uttan fyri bátahylin og suður úr bygdini. Eisini hetta strekkið er sambært løgtingsmanninum í sera ringum standi.

– Bilar, ið ikki ansa sera væl eftir, punktera og fáa skaða av at koyra á strekkinum, skrivar hann.

Vegurin liggur í einum tætt bygdum øki, har fólk í øllum aldri búgva, og nógv ferðsla er har alt árið. Magni Højgaard nevnir eisini náttúruperluna við Prestá, sum liggur fram við strekkinum.

Hann heldur tað vera sera óheppið, at vitjandi skulu koyra eftir einum so vánaligum og ótryggum vegi.

Løgtingsmaðurin spyr tí eisini, um Landsverk í raðfestingini tekur serligt atlit til vegir í tættbygdum økjum, og um mett verður um longdina á strekkinum, vavið á arbeiðinum og ferðslutrýstið.

Fyrispurningurin varð latin inn á Løgtingi 18. august. Jacob Vestergaard hevur ikki svarað honum enn.