Kenda Bayeux teppið verður tryggjað fyri 800 milliónir pund, svarandi til 6,9 milliardir krónur, meðan tað verður lánt Bretlandi í 2026.
Tað skrivar bretski miðilin The Guardian.
Hetta er fyrstu ferð í meira enn 900 ár, at Bayeux-teppið - sum er eitt 70 metrar langt veggteppið - kemur aftur til Bretlands.
Teppið myndar normannisku innrásina og Hastings-bardagan í 1066 gjøgnum 58 senur, og tað verður sýndur fram á British Museum frá september næsta ár.
Bretski ríkiskassin hevur ábyrgdina av tryggingini av Bayeux-teppinum, sum skal dekka tað móti skaðum undir flutningi úr Fraklandi og í tíðarskeiðnum, tað verður sýnt fram á bretskari jørð.
Tryggingin verður fevnd av Government Indemnity Scheme, sum ger, at lista- og mentanarlutir kunnu sýnast fram í Bretlandi.
Sambært The Guardian skrivar The Financial Times, at landskassin fyribils hevur góðkent eitt mett virði á teppinum, meðan endaliga metingin væntandi verður umleið 800 milliónir pund.
Bayeux-teppið verður hildið at hava verið gjørt í 11. øld í Onglandi eftir boðum frá Odo biskupi í Bayeux.
Tað er útlánt til Bretlands, meðan savnið Le musée de la tapisserie de Bayeux í Normandie er stongt fyri umvælingum. Tað letur væntandi upp aftur í oktober 2027.
Teppið kann síggjast á framsýningini á bretska savninum í London frá heysti 2026 til juli 2027, skrivar The Guardian.
Lánið av Bayeux-teppinum er partur av eini størri lánsavtalu millum bretska forsætisráðharran, Keir Starmer, og franska forsetan, Emmanuel Macron, sum varð kunngjørd í juli.
Bretska savnið skal læna Sutton Hoo savnið, Lewis Chessmen savnið og fleiri aðrar lutir til Fraklands í staðin fyri teppið.
Í Fraklandi hava sambært The Guardian røddir frá listahøpinum áður heitt á Macron um at sleppa avtaluni. Hetta kemst av strúan um, at flutningurin av Bayeux-teppinum kann elva til óbøtandi skaða á teppið.
/Ritzau/
