Viborg hevur bara spælt seks dystir í evropeiskum kappingum

Í kvøld klokkan 18 spælir B36 fyrra dystin í triðja undanumfarinum móti danska superligaliðnum, Viborg FF á leikvøllinum hjá Viborg.

Returdysturin verður á Tórsvølli komandi týskvøld klokkan 19. Tá sigur FM1 beinleiðis frá dystinum. 

Samanlagdi vinnarin fær eina spennandi uppgávu í Play Off umfarinum, har Premier League felagið, West Ham United verður mótstøðuliðið. 

Viborg er risafavorittur at vinna dystin á B36 hjá øllum veddingarfyritøkunum.

Men B36 hevur eina munandi longri og størri evropeiska søgu enn Viborg. 

Dystirnir hjá B36 móti Viborg vera dystur nummar 56 og 57 í evropeisku søguni hjá felagnum. Í teimum 55 dystunum higartil hevur B36 átta sigrar, 12 javnleikir og 35 tap. Málmunurin hjá B36 í hesum 55 dystunum er 48-120.

Viborg spældi sum steypavinnari fýra dystir í UEFA Cup undankappingini í 2000. Í fyrsta umfarinum vann Viborg 1-0 á CSKA Moskva heima, og leikti javnleik 0-0 á á útivølli. Í øðrum umfarinum tapti Viborg 0-1 úti fyri Rayo Vallecano úr Spania. Viborg vann 2-1 heima og reyk út orsaka av táverandi regluni um, at mál á útivølli telja dupult.

22 ár skuldu ganga áðrenn Viborg aftur fór út í Evropa at kappast. Í øðrum undanumfarinum í ársins Europa Conference League undankapping vann Viborg 1-0 og 1-0 á estiska liðnum, FK Suduva. 

Viborg hevur sostatt fýra sigrar, ein javnleik og eitt tap í seks evropeiskum dystum. Málmunurin er 5-2.

B36 er greiður "underdog" á leikvøllinum í Viborg í kvøld, men hevur væl fleiri royndir í Evropa. Spurningurin er bara um tað er nóg mikið til at steðga Viborg?

HER er yvirlitið yvir dystirnar Viborg hevur leikt í Evropa higartil: