Vit kunnu ikki annað enn at taka eitt samdøgur ísenn. Tað sigur Edvard Heen, stjóri í Almannaverkinum, nú pedagogarnir á stovnum undir Almannaverkinum eru farnir í verkfall í morgun. Edvard Heen sigur, at tey søktu Pedagogfelagið um at fáa 139 undantøk, tí tey meta, at tað er tað minsta talið sum krevst av starvsfólki fyri at sleppa undan at lív og heilsa verður sett í vanda.

Men tey fingu bara 16 undantaksloyvi og stjórin í Almannaverkinum sigur, at avleiðingin av hesum er, at tey verri enn so tað neyðuga talið á starvsfólki til kunna veita eina forsvarliga tænastu. Vit eru í eini støðu nú, har lív og heilsa er í váða, leggur hann afturat.

Bústovnarnir undir almannaverkinum er heimið hjá teimum, sum búgva har, men í nøkrum førum er støðan tann, at tey kunnu ikki vera heima og tí hava avvarðandi verið noydd til at taka tey heim til sín. Stjórin í Almannaverkinum heldur, at tað er rættiliga prinsipielt, at fólk ikki skulu vera noydd at fara heimanífrá, men tað er so støðan, nøkur av búfólkunum á stovnunum eru í.

Edvard Heen sigur, at sum støðan er nú, kunnu tey ikki annað enn at taka ein dag í senn og meta um støðuna frá degi til dags. Men hann sigur, at hetta er ein støða, sum ikki kann halda fram og tí er tað hansara staðiliga áheitan á stríðandi partarnar um at finna eina virðiliga loysn.

Sum vit skrivaðu fyrr í morgun, metir Pedagogfelagið, at tey eru kroyst til at fara í verkfall - og tað er við beráddum huga. Les meiri um tað her. Vit eru trýst til at fara í verkfall