Útbúgvingarmálaráðið í Danmark boðar frá, at nú verða føroysk og grønlendsk lesandi javnsett við onnur lesandi við øðrum móðurmáli enn donskum.

Ítøkiliga kemur hetta at merkja, at føroysk lesandi kunnu søkja um til dømis longri próvtøkutíð ella atgongd til orðabøkur. Eitt nú hava íslendsk, norsk og svensk lesandi longu henda rættin. 

- “Tað er eitt stórt stig at flyta niður at lesa. Har er nógv at seta seg inn í, bæði praktiskt og bókliga, og fyri summi kann tað vera avbjóðandi fyrstu tíðina – tað kenni eg sjálv til. Tí eri eg sera fegin um, at lesandi nú fáa betri karmar, sum kunnu vera ein hjálpandi hond fyrstu tíðina,” sigur Anna Falkenberg, fólkatingskvinna.

- “Flestu føroyingar duga ordiliga væl danskt, men at skriva vanligt danskt og akademiskt danskt er hvør sítt. Tí kann tað vera gott at hava betur stundir ella eina orðabók við sær í byrjanini av lestrinum, tá ein situr til próvtøku,” leggur hon avtrat. 

Úrslit av einum drúgvum arbeiði

Broytingin er úrslit av einum drúgvum arbeiði millum eitt nú MFS og Sambandsflokkin á fólkatingi. 

MFS heitti í fjør á føroysku fólkatingslimirnar um at arbeiða fyri, at føroysk lesandi fáa somu møguleikar sum onnur lesandi í Danmark. Anna Falkenberg tók hetta beinaveg upp við Christina Egelund, útbúgvingarmálaráðfrú, í fyrstu atløgu saman við Sjúrði Skaale, fólkatingslimi.

Til seinasta fólkatingsval var hetta málið partur av valskránni hjá Sambandsflokkinum, og eftir valið var málið tikið við í danska samgonguskjalið eftir áheitan frá Sambandsflokkinum. 

Síðani hevur Sambandsflokkurin á Fólkatingi fylgt málinum upp í fleiri førum – seinast í juni í ár.

Í nýggjum svari upplýsir útbúgvingarmálaráðið, at nú verður próvtøkukunngerðin í Danmark broytt, so føroysk og grønlendsk lesandi fáa sama rætt sum onnur lesandi við øðrum móðurmáli enn donskum. Samstundis heitir útbúgvingarmálaráðið á allar hægri lærustovnar í Danmark at gera eins reglur á økinum. 

Áður er komið fyri, at lesandi á einum lærustovni fáa játtandi svar, meðan lesandi á øðrum lærustovni fáa noktandi svar. Nú verða greiðari reglur á økinum.

Anna Falkenberg leggur dent á, at úrslitið er komið í lag gjøgnum eitt tætt samstarv við MFS.

 - “Eg vil takka MFS fyri gott samstarv. Tey hava verið við at sett málið á dagskránna, og saman hava vit fylgt málinum upp, og nú liggur ein ítøkilig loysn á borðinum”

Sambandsflokkurin á Fólkatingi