Tórshavnar býráð skal á fundinum í dag taka støðu til ætlanina um bilfríar dagar í miðbýnum.

Upprunaliga var ætlanin at royna skipanina bæði í juli og desember í ár. Men tíðin varð mett at vera ov knøpp til at fyrireika summarið 2026, og samstundis eru ymiskar um- og nýbyggingar í miðbýnum. Tí varð summartiltakið útsett til juli næsta ár.

Ætlanin er nú, at Niels Finsens gøta frá Káta Horninum til og við Vaglið verður bilfrí í desember 2026 og juli 2027. Hetta skal vera ein roynd, sum sambært kommununi skal økja um trivnaðin hjá borgarum og skapa betri umstøður fyri vinnu og lív í miðbýnum.

300.000 krónur til lív í gøtuni

Kommunan ætlar ikki bara at steingja gøtuna fyri bilum. Ætlanin er eisini at skapa virksemi í økinum, so fólk hava orsøk at koma oman í miðbýin og uppihalda sær har.

300.000 krónur skulu setast av til átakið í desember. Visit Tórshavn skal samskipa verkætlanina og hava samskifti við vinnuna í miðbýnum. Fígging til átakið í juli 2027 skal raðfestast á fíggjarætlanini fyri næsta ár.

Kommunan vísir á, at líknandi roynd varð gjørd í Vágsbotni í 2022. Tá varð økið skipað til trivnað og uppihald, og Visit Tórshavn var við til at samskipa tiltøk. Sambært kommununi varð royndin væl móttikin.

Vørukoyring og hýruvognar sleppa fram

Hóast gøtan verður bilfrí, verður ikki talan um fullkomiliga at steingja fyri allari koyring. Vøruvognar skulu sleppa til handlar og annað virksemi á ávísum tíðum á degnum.

Somuleiðis skal pláss vera fyri hýruvognum. Tekniska nevnd hevur sett sum treyt, at hýruvognar framvegis skulu kunna tæna borgarum á Vaglinum á nøktandi hátt.

Vinnunevndin hevur tikið undir við ætlanini, og fíggjarnevndin samtykti 9. september at beina málið í býráðið til tvær viðgerðir. Kári Johansen tók ikki undir við tilmælinum.

Eftir royndirnar skal átakið eftirmetast, áðrenn støða verður tikin til, um bilfríu dagarnir skulu gerast afturvendandi.