Leygardagin 19. september, sum er leygardagin komandi, verður árligi Eplafestivalurin á Sandi.

- Frá morgni til langt út á kvøldið verður bygdin fylt við góðum føroyskum mati, spennandi sølubásum, góðum tónleiki, barnaundirhaldi, fyrilestrum og øðrum tiltøkum.

Soleiðis siga fyrireikararnir.

Eplafestivalurin er ein fjølbroyttur heystfestivalur, har føroyskar rávørur, matmentan og bygdalív ganga hond í hond.

- Í ár verður aftur nógv gjørt burtur úr at skapa lív kring alla bygdina, og bæði privat heim, kjallarar, hoyloft og fjós lata dyrnar upp og bjóða øllum at vera vælkomin innar.

Fyriskipararnir siga, at frá klokkan 10 leygarmorgunin verða sølustøð kring Traðir, sum er gamli býlingurin á Sandi, har vitjandi kunnu keypa heimavirkaðar og heimaframleiddar matvørur, grønmeti, nýflett lambskjøt, súltutoy, heimabakað, handverk og annað.

- Tann stuttligi eplaláurin koyrir fólk í pendulfarti millum Traðir og Miðstovugarðin, har møguleiki er at keypa føroyskt grønmeti. Eitt upplagt høvi at fylla posarnar við føroyskum matvørum til Et-Føroyskt-vikuna í komandi viku.

Sagt verður, at matur verður sum heild ein stórur partur av degnum.

- Í vakstrartunlinum hjá Búnaðarstovuni fara stjørnukokkarnir hjá PAZ at borðreiða við eplum, grønmeti og røstum fiski, og um kvøldið verður Støkk-Upp matstova í Virkinum, har Sommer Matveiting borðreiðir við flottari gourmet matskrá.

Eisini verður Grøna Matveitingin við matbási og sera hugnaliga heimakaféin Patata Kafé sum letur upp longu klokkan10 við kanelsniglum, BVO og kaffi.

Okkurt til øll

Men Eplafestivalurin er nógv meira enn matur.

- Á skránni eru barnaundirhald og barnasangur við Árna Jóhannesson, skótarnir gera poppkorn á báli, neytalortakapping, listaframsýning, harmonikutónleikur og fólkatónleikur.

Klokkan 15 leygardagin skipar Veltan fyri fólkafundi við Tingborð, har evnið verður sambandið millum menniskja og náttúruna, við røðum frá Magna Gaard og Tjóðhild Patursson, yrkingaupplestri frá Oddfríði Marna Rasmussen og tónleiki frá Guðrið Hansdóttir.

- Seinnapartin og um kvøldið flytur festivalurin seg oman á Sand. Klokkan 17.30 verður heystgudstænasta, og frá klokkan 18 verður bál, eplaklappingar og felagssangur, har Eyðstein Ólason spælir undir á harmoniku.

Tað verður eisini lív í bygdini á Sandi til langt út á kvøldið.

- Café Retro hevur opið til klokkan 03.45, Pubbin hjá Arabo letur upp klokkan 20, ungdómskafé verður í Missiónshúsinum, og frá klokkan 21 -24 spæla Frankie og Ási livandi tónleik á Café Retro.

Endamálið við Eplafestivalinum er at savna fólk um tað, sum verður dyrkað, framleitt.

- Festivalurin skal vera ein dagur, har øll bygdin livir, og har bæði børn og vaksin kunnu hugna sær, eta væl, uppliva okkurt nýtt og vera saman, siga fyriskipararnir.

Eplafestivalurin verður leygardagin 19. september 2026 á Sandi. Tiltøkini byrja klokkan 10, og skráin heldur fram til langt út á náttina.

Fyriskipararnir minna á, at ikki øll sølustøð hava gjaldsterminal, og tí er skilagott at hava reiðan pening við. Øll skráin fyri stóra tiltakið á Sandi kann lesast á Facebook-vanganum, Eplafestivalurin.