Tríggir bilar vóru partur av einum ferðsluóhappi beint við munnan á Leirvíkstunlinum leirvíksmegin. Óhappið varð fráboðað løgregluni klokkan 18.20.

Sambært løgregluni rakti ein bilur fyrst ein mótkoyrandi bil og síðani ein annan mótkoyrandi bil.

Sjúkrabilar og løgregla vórðu send á staðið. Sjey fólk vóru í teimum trimum bilunum, og tveir sjúkrabilar eru farnir av staðnum við tilsamans trimum fólkum, sum eru flutt á sjúkrahús. Hini verða kannað á staðnum.

– Fráboðanirnar av staðnum benda ikki á, at talan er um álvarsaman fólkaskaða, sigur vaktleiðarin.

Stongt er fyri ferðslu, meðan bilarnir verða fluttir og vegurin ruddaður. Nógvir bilar bíða, og løgreglan verður á staðnum eina løtu afturat fyri at fáa ferðsluna í gongd aftur.

– Vit royna at gera tað so skjótt, vit kunnu. Vónandi verður tað skjótt. So skjótt opið er aftur, boða vit frá á Facebook, sigur vaktleiðarin.