Fyrr í summar sá tað einki út hjá Skála ÍF, sum av álvara var í vanda fyri at missa plássið í Meistaradeildini. Nú er tað greitt, at Skála ÍF eisini í 2027 fer at kappast í Meistaradeildini.

Undan síðsta umfari var tað greitt, at um Skála ÍF vann stig á útivølli ímóti EB/Streymi, so var plássið í bestu deildini tryggjað.

Og Skála ÍF syrgdi av álvara fyri sær sjálvum.

Í dag hevði Poul N. Poulsen fyri áttandu ferð ábyrgdina, síðani hann fyrr í summar tók við sum venjari. Skála ÍF vann 2-0, og hetta var onnur ferðin, at Poul N. Poulsen og skálamenn í felag vunnu fulla úrtøku. Í fimm av átta dystum er tað endað javnt.

Miðvallarin og liðformaðurin Jákup Pauli Frederiksberg legði við Margáir Skála ÍF framum 1-0 í 9. minutti. Uppleggið átti Martin Johansen, sum eftir langan skaðasteðg fleiri ferðir hevur verið innskiftari, men sum í dag var millum teir fyrstu ellivu. Hetta var fimta ferðin í ár, at Jákup Pauli Frederiksberg var málskjútti í bestu deildini.

Í tíðini, sum dómarin legði aftrat fyrra hálvleiki, øktu gestirnir um munin til 2-0. Málskjútti var Silas Gaard, sum fyri aðru ferð var málskjútti, síðani hann síðsta vetur fór at spæla við Skála ÍF.

Sigurin í dag ber við sær, at skálamenn endaðu kappingarárið á sætta plássi. Skála hevur 28 stig, AB hevur 28 stig, EB/Streymur hevur 27 stig, og undir strikuni endaðu 07 Vestur við 25 stigum og B68 við 20 stigum.  

Tað er ikki so ofta, at báðir uppflytararnir sleppa undan at flyta niður aftur, men soleiðis er tað í ár. Í fjør fluttu Skála ÍF og AB upp, og í 2027 vera bæði skálamenn og argjamenn aftur í bestu deildini.