Meira enn 5.000 fólk hava nú latið lív í ebolafarsóttini, sum herjar í DR Kongo.

Tað vísa tøl, sum stjórnin í landinum kunngjørdi fríggjadagin, skrivar Reuters sambært Ritzau.

Farsóttin varð staðfest um miðjan mai og hevur síðani breitt seg til átta av teimum 26 landslutunum í landinum. Meira enn 10.000 smittutilburðir eru skrásettir.

Sambært Reuters hava seinkað smittuuppsporing, vápnað stríð í landinum og eitt hart trýst heilsuverk verið við til at gera, at smittan hevur breitt seg skjótari enn undir fyrrverandi ebolafarsóttum.

Tilburðir eru eisini staðfestir í Uganda, Kenja og Nigeria. Heimsheilsustovnurin, WHO, lýsti tó Uganda frítt fyri sjúkuna í august. Fyrstu tilburðirnir í Kenja og Nigeria vórðu staðfestir fyrr í oktober.

Hetta er tann deyðiligasta ebolafarsóttin í søguni hjá DR Kongo og tann næstdeyðiligasta í heiminum.

Bert farsóttin í Vesturafrika frá 2014 til 2016 kravdi fleiri mannalív. Tá doyðu meira enn 11.000 fólk í Guinea, Liberia og Sierra Leone.

/ritzau/