Gylta Djurhuus á Neystabø staðfesti enn einaferð, at Rakul Wardum og Annika Fríðheim Petersen hava harða kapping, tá landsliðsvenjararnir skulu taka út endaliga EM-hópin.
Í dag bjargaði Gylta 15 av 33 málroyndum, svarandi til 45 prosent, tá lið hennara, Skuru á heimavølli vann stórsigur 33-22 (15-8) á Ystad.
Skuru er fjórðfremst í bestu svensku hondbóltsdeildini við seks stigum.
Komandi mikukvøld klokkan 18 spælir Skuru dyst á útivølli móti oddaliðnum, Sävehof í Partille.
