Fólk skulu fáa betri rúm at ganga og steðga á í miðbýnum í Havn.

Tað er endamálið við einari roynd, sum Tórshavnar býráð samtykti við aðru viðgerð á fundinum í gjár. Gongugøtan verður stongd fyri almennari bilferðslu í desember 2026 og juli 2027.

Avgerðin varð samtykt við 11 atkvøðum fyri og tveimum ímóti. Tróndur Sigurðsson og Kári Johansen atkvøddu ímóti.

Tiltøk skulu skapa lív í gøtuni

Ætlanin er at nýta gongugøtuna til tiltøk og uppihald, meðan hon er bilfrí. Visit Tórshavn skal samskipa átøkini og kunna og hoyra vinnuna í miðbýnum.

Í málslýsingini verður dentur lagdur á, at tað ikki er nóg mikið bert at steingja fyri bilum. Virksemi skal eisini vera í gøtuni, sum fær fólk at leita oman í býin.

Kommunan vísir í hesum sambandi á royndirnar frá Vágsbotni í 2022, tá ein samskipari skipaði fyri tiltøkum á torginum saman við Visit Tórshavn. Sambært málslýsingini vóru royndirnar góðar.

300.000 krónur verða fluttar frá játtanini til fríðkan av býnum til vinnutiltøk í sambandi við »Jól í miðbýnum«. Fígging til átakið næsta summar skal raðfestast á fíggjarætlanini fyri 2027.

Vørukoyring skal framvegis bera til

Hóast gøtan verður bilfrí, skulu handlar og annað virksemi framvegis kunna fáa vørur.

Økið skal skipast soleiðis, at vøruvognar sleppa framat ávís tíðarskeið á degnum. Eisini skulu hýruvognar hava møguleika at tæna borgarum á Vaglinum, og øki verður sett av til teirra virksemi millum ráðhúsið og Havnará.

Ætlanin var upprunaliga at royna bilfría miðbýin longu í summar. Hetta varð tó útsett, tí tíðin til fyrireikingar var ov stutt, og byggiarbeiði var í miðbýnum.

Eftir royndartíðarskeiðini skal átakið eftirmetast.