Nýggja Etiska Ráðið, sum tók við 1. oktober, er farið til verka við Katrini Kallsberg, serlækna í kvinnusjúkum, sum forkvinnu.

Í dag heilsaði Eyðdis Hartmann Niclasen, landsstýriskvinna í heilsu- og orkumálum, upp á nýggja ráðið.

Uppgávan hjá Etiska Ráðnum er at fremja og styrkja kjak og vitan um etiskar spurningar á heilsuøkinum, almannaøkinum og kommunala økinum og at gera bæði myndugleikar og borgarar betur før fyri, at taka støðu í etiskum spurningum.

- Ráðið skal eisini eygleiða gongdina í samfelagnum, og av egnum ávum taka almennar og prinsipiellar etiskar spurningar upp - um millum annað gransking í og nýtslu av biotøkni og ílegutøkni.

Landsstýriskvinnan, Eyðdis Hartmann Niclasen, leggur dent á, at arbeiðið hjá Etiska Ráðnum nemur við grundleggjandi spurningar um heilsu, sjálvsavgerðarrætt og ábyrgd fyri hvørjum øðrum.

Samstundis heldur hon tað vera týdningarmikið, at ráðið er óheft og hevur frælsi til at velja evni, seta spurningar og koma við egnum metingum.

Etiska Ráðið verður valt fyri fýra ár í senn, og nýggja ráðið hevur níggju limir. Tey eru: Katrin Kallsberg, forkvinna, Vár Honnudóttir, Arni Zachariassen, Súsanna Skaale, Sissal Jørgensen, Regin Berg, Jógvan Páll Fjallsbak, Hanus á Gørðum og Jóngerð Guttesen.