Kaveh Magnusson gevst sum høvuðsvenjari hjá KÍ-kvinnunum, tá ið kappingarárið endar 24. oktober.

Kaveh kom til KÍ undan hesum kappingarárinum við einum eitt ára sáttmála, og saman við leikarum og venjaratoymi hevur hann staðið á odda fyri einum sera væleydnaðum kappingarári.

KÍ hevur í ár vunnið Stórsteypadystin, steypakappingina og landskappingina og hevur sostatt tryggjað sær The Treble. Harumframt er enn ein Champions League-luttøka tryggjað.

– Eg havi rokkið teimum málum, sum eg setti mær, tá ið eg kom til felagið, og eg eri sera errin av tí, sum vit hava avrikað saman. Serliga vil eg takka leikarunum, venjaratoyminum og ítróttarstjóranum fyri álitið og fyri at hava trúð upp á ta fótbóltshugsjón, sum vit løgdu frá byrjan, sigur Kaveh Magnusson.
Landskappingin varð avgjørd við tveimum dystum eftir. Eftir 24 dystir hevði KÍ skorað 105 mál, bert latið 9 mál inn og hildið málið reint í 18 dystum.

– Hópurin hevur víst ein framúr góðan hugburð, arbeiðsvilja og samanhald gjøgnum alt árið. Mentanin í hópinum hevur verið sterk, og tað hevur verið eitt av grundarløgunum undir úrslitunum, sigur Kaveh.
Hann leggur eisini dent á serliga felagsskapin kring KÍ.

– Eg havi hitt nógv góð fólk, og sjálvbodna arbeiðið kring felagið og í býnum er nakað heilt serligt. Tað merkist, at nógv hjarta er lagt í KÍ.

Frá KÍ verður stór tøkk send Kaveh fyri arbeiðið í felagnum.

– Kaveh hevur komið við greiðum hugskotum, høgum krøvum og einari sterkari fótbóltshugsjón. Saman hava vit rokkið nøkrum heilt serligum hetta kappingarárið, og vit eru sera takksom fyri tað arbeiðið, hann hevur lagt í KÍ saman við leikarunum og venjaratoyminum.

Vit ynskja Kaveh alt tað besta í hansara næstu avbjóðing.

Tveir dystir eru tó eftir av kappingarárinum, og nú er fokus á at enda eitt minniligt kappingarár á besta hátt.