Eftir fleiri dagar við sera javnari uppteljing er greitt, at svenska andstøðan við Socialdemokraterna á odda hevur fingið meirilutan av sessunum í Ríkisdegnum.

Andstøðuflokkarnir fáa 176 av teimum 349 sessunum, meðan Tidö-flokkarnir, sum hava verið grundarlagið undir borgarligu stjórnini hjá Ulf Kristersson, fáa 173. SVT vísir somu mandatbýting við støði í tølum frá svenska Valmyndigheten.

Socialdemokraterna hjá Magdalenu Andersson gjørdist størsti flokkur við 28 prosentum av atkvøðunum og 99 tinglimum. Moderaterna hjá Ulf Kristersson fekk knappliga 20 prosent og 70 tinglimir.

Úrslitið merkir, at Ulf Kristersson hevur boðað frá, at hann leggur frá sær sum forsætisráðharri. Sambært Ritzau hevur hann almannakunngjørt mynd av fráfaringarumbøn síni á X.

Stjórnin hjá Kristersson hevur verið mannað av Moderaterna, Kristdemokraterna og Liberalerna, meðan Sverigedemokraterna hevur verið stuðulsflokkur. Hesir fýra flokkarnir verða nevndir Tidö-flokkarnir.

Hinumegin standa Socialdemokraterna, Vänsterpartiet, Miljöpartiet og Centerpartiet. Tey hava tilsamans 176 sessir: Socialdemokraterna 99, Vänsterpartiet 30, Centerpartiet 25 og Miljöpartiet 22.

Úrslitið er sostatt øvugt av valinum í 2022. Tá fekk stjórnargrundarlagið hjá Kristersson 176 sessir og mótstøðusíðan 173.

Tað er kortini ikki sjálvvirkandi greitt, hvussu ein nýggj svensk stjórn verður skipað. Nývaldi Ríkisdagurin kemur saman 28. september og velur tingformann. Síðani kann arbeiðið við at fáa eina nýggja stjórn upp á pláss av álvara byrja.

Magdalena Andersson var forsætisráðfrúa frá 2021 til 2022 og er nú aftur í miðdeplinum í samráðingunum um komandi stjórn.