Sámiski rithøvundurin Sigbjørn Skåden fær bókmentavirðisløn Norðurlandaráðsins fyri skaldsøguna Láŋtdievvá/Planterhaug, sum kom út í 2025. Heitið kann umsetast til Plantuhædd.
Tað upplýsir Norðurlandaráðið í tíðindaskrivi.
Dómsnevndin lýsir bókina sum eina sjáldsama og spælandi skaldsøgu, ið samstundis fer djúpt í søguna.
– Hetta er ein serstøk skaldsøga við sjáldsamari spæligleði og einari søguliga djúptgangandi frásøgn, sum skilir seg burtur úr bæði norskum og sámiskum samtíðarbókmentum, sigur dómsnevndin í grundgevingini.
Heim aftur at kanna eitt andlát
Skaldsøgan snýr seg um kriminalløgreglumannin John Edgar Huuva, sum fer aftur til heimstaðin at kanna eitt andlát.
Sum søgan líður, verða spurningar um sámiska samleikan í nútíðar Noregi tiknir upp.
Bókin er givin út bæði á sámiskum og norskum. Í norsku útgávuni skiftir Sigbjørn Skåden millum tornesámiskt, nýnorskt og bókmál.
Hetta er bert aðru ferð, at bókmentavirðisløn Norðurlandaráðsins verður latin einum sámiskmæltum verki. Fyrru ferð var í 1991, tá Nils-Aslak Valkeapää fekk virðislønina fyri Beaivi, Áhčážan – á donskum Solen, min far.
Sámarnir eru upprunafólkið í Sápmi, sum fevnir um norðaru partarnar av Noregi, Svøríki og Finnlandi og Kolahálvoynna í Russlandi. Umleið 30.000 fólk tosa sámisk mál.
Fær 300.000 krónur
Bókmentavirðisløn Norðurlandaráðsins verður latin á hvørjum ári fyri eitt fagurbókmentaligt verk, sum ein núlivandi høvundur hevur skrivað á einum norðurlendskum máli.
Endamálið er at vekja størri áhuga fyri norðurlendska mentanarfelagsskapinum og at heiðra framúrskarandi listarlig avrik.
Hvørt av teimum fimm norðurlondunum kann tilnevna tvey verk. Harumframt kunnu verk á føroyskum, grønlendskum og sámiskum og eitt verk úr Álandi verða tilnevnd.
Hinar virðislønirnar hjá Norðurlandaráðnum vórðu eisini kunngjørdar týsdagin. Hilde Hagerup fær barna- og ungdómsbókmentavirðislønina, og norski filmurin Affeksjonsverdi fær filmsvirðislønina.
Kristine Tjøgersen og Benedicte Maurseth fáa tónleikavirðislønina fyri verkið Elja, meðan norski felagsskapurin Miljøagentene fær umhvørvisvirðislønina.
Hvør virðisløn er 300.000 danskar krónur. Virðislønirnar verða handaðar á ársfundinum hjá Norðurlandaráðnum í Helsinki 27. oktober.
Ritzau
