Sekteiðarin og prædikumaðurin í Kenja, Paul Mackenzie, er dømdur sekur í drápi av 190 børnum og einum vaksnum.
Limirnir í bólkinum vórðu bidnir um at svølta seg fyri at sleppa at møta Jesusi.
Tað var í gjár, at ein dómstólur á strandabýnum í Kenja, Mombasa, dømdi Paul Mackenzie og fleiri aðrar leiðandi persónar í trúarbólkinum sekar í drápi.
Hvør revsingin verður, verður sambært NRK kunngjørt hin 6. november.
Fyri trimum árum síðan vóru fleiri lík funnin í hópgravum, sum kundu knýtast til trúarbólkin. Fleiri enn 400 lík vórðu funnin, harav næstan helmingurin vóru børn.
Framvegis eru nøkur av líkunum ikki eyðmerkt.
Ákæruvaldið segði undir rættarmálinum, at Good News International Church var ein dómadagssekt, har limirnir fingu boð um at svølta seg, soleiðis at tey kundu koma í himmiríkið, áðrenn heimurin gekk til grundar.
Paul Mackenzie var pastor - ella prestur- í trúarbólkinum, og hann kom í kikaran hjá løgregluni, tá tvey børn hjá limum í bólkinum vórðu svøltað til deyðis.
Tað hevur skelkað Kenya og skapti fyri trimum árum síðan nógv kjak í landinum, at stórir partar av fólkinum hoyra til ymiskar trúarbólkar.
Paul Mackenzie og 28 onnur í bólkinum hoyrdu dómaran lesa dómin upp í gjár.
- Eg eri sanndørdur um, at ákæruvaldið hevur prógvað, at hesi 29 eru sek í drápi av 190 børnum og einum vaksnum persóni, segði dómarin í rættinum í Kenja.
Fleiri av teimum avvarðandi vóru hjástødd í rættinum, tá dómurin varð sagdur.
- Hetta er ein sera, sera týdningarmikil dagur fyri meg, segði Francis Wanje, sum er 62 ár, tá rættarfundurin byrjaði mánadagin.
Francis Wanje hevur mist átta av sínum nærmastu í sektini, Good News International Church, eitt nú eina dóttir og tvey abbabørn, veit norska kringvarpið - NRK - at siga.
Í greinini verður lagt aftrat, at flestu børn doyðu í hungri, og onnur doyðu, tí tey vórðu kvald ella høvdu fingið slag í høvdið.
Á myndini her niðanfyri, sum er tikin í 2024, eru tað avvarðandi kvinnur, sum syrgja, eftir at tær hava fingið útflýggja leivdirnar av fólki í familjuni, sum lótu lív í hungurssektini í Kenja.
Meira um hetta kann lesast á www.nrk.no
