– Tað kostar at veita skipum tænastu í Tórshavnar havn. Og verður tað soleiðis, at landið ikki vil rinda fyri hesar tænastur, so kann Tórshavnar havn ikki tryggjað skipunum fast pláss í Havn.

Tað sigur Elsa Berg, borgarstjóri í Havn, nú býráðið er kallað saman til fundar í dag klokkan 16:30 at viðgera íkomnu støðuna, nú landsstýrið ætlar at frítaka skipini hjá landinum fyri havnargjald, brúgvagjald og vørugjald.

Havnarnevndin hjá Tórshavnar býráð hevur havt fund í morgun og hevur samtykt eitt skriv, sum verður lagt fyri býráðsfundin til støðutakan og umrøðu, sigur Heðin Mortensen, sum er formaður í Havarnevndini. Hann vísir eins og borgarstjórin á, at Tórshavnar havn ikki kann tryggja skipum fast pláss, um tey ikki vilja rinda fyri tænastuna.

– Tórshavnar havn hevur altíð tvey pláss klár til Smyril, tí umstøðurnar kunnu gera, at hann ikki fær lagt at á fasta plássinum. Somuleiðis hevur skipið til Nólsoyarleiðina eisini tryggjað fast pláss, sigur hann.

Elsa Berg, borgarstjóri, og Heðin Mortensen, formaður í Havnarnevndini vísa, at ein sáttmáli er millum Tórshavnar havn og strandferðsluna um hesi viðurskifti.

Og tann sáttmálin gongur ikki út á nýggjárinum, sigur Elsa Berg.

Hon vónar sum vera man ikki, at hetta uppskotið frá landsstýrismanninum verður samtykt í Løgtinginum, men vísir á, at tað er lagt fram, tað hevur verið til viðgerar í landsstýrinum, so hon kann ikki gera annað enn taka tað í álvara.

– Men óansæð um hetta verður samtykt ella ikki, so er hetta ein álvarsligur smeitur fyri samstarvið millum Tórshavnar býráð og landsstýrið, sigur hon.

– Hevur hevur einki – slett einki – samskiftið verið millum partarnar. Ikki so frægt sum ein sms'ur ella teldupostur um málið, sum heldur ikki hevur verið til hoyringar, sigur Elsa Berg, borgarstjóri.

Men Tórshanvar býráð hevur kortini gjørt eitt hoyringsskriv, sum tey hava sent øllum løgtingslimum.

Málið kemur sum nevnt fyri á býráðsfundi í Havn, sum verður klokkan 16:30. Fundurin verður stroymdur her.