Tað skrivar BBC.
Sambært eini fráboðan á heimasíðu hennara andaðist Bonnie Tyler mikukvøldið á einum sjúkrahúsi í Portugal, har hon fekk viðgerð fyri sjúku.
Í mai varð hon innløgd á sjúkrahús í Faro og gjørdist skurðviðgjørd í skundi fyri tarmatrupulleikar. Eftir skurðviðgerðina komu álvarsligar trupulleikar, og hon varð løgd í kunstugt koma. Í juni varð upplýst, at hon var vaknað aftur, men støðan var framvegis álvarslig.
Bonnie Tyler var serliga kend fyri heimshittini It's a Heartache frá 1977 og Total Eclipse of the Heart frá 1983. Hennara sermerkta hása rødd gjørdist eitt eyðkenni, eftir at hon hevði verið undir skurði í hálsinum seint í 1970'unum.
Hon hevði eina yrkisleið, sum vardi í nærum 50 ár, og var framvegis virkin sum tónleikari. Í 2013 umboðaði hon Bretland í Eurovision við lagnum Believe in Me.
Bonnie Tyler skuldi eftir ætlan spæla á konsert í Næstved í Danmark í november, men hon noyddist at avlýsa summartúrin vegna sjúkuna.
Bonnie Tyler hevur eisini verið í Føroyum. Tað var í 2006, tá hon vitjaði á Mjús festivalinum á Sandi.
Hon varð fødd í Wales í 1951 undir navninum Gaynor Hopkins. Saman við manni sínum, fyrrverandi judoutøvaranum Robert Sullivan, var hon gift í meira enn 50 ár. Tey fingu ongantíð børn.
