Fólk í hópatali ringja til Heilsufrøðiligu Starvsstovuna, tí tey hava ampa av skipunum úti á redini, men tey verða bert víst víðari til Vaktar- og Bjargingartænastuna og Havnarskrivstovuna í Havn.
Bárður Enni, stjóri á Heilsufrøðiligu Starvsstovuni sigur, at tey ongar kanningar hava gjørt í Nólsoyarfirði í sambandi við virksemið har.
Umhvørvislógin
røkkur ov stutt
- Umhvørvislógin, sum vit arbeiða eftir, vísir ikki greitt, hvussu langt hon røkkur. Heimildin er ógreið, tá tosað verður um sjógvin, um tað er til strandakantin ella tríggjar -12 fjórðingar út, sigur Bárður Enni.
Hann vísir til Vaktar- og Bjargingartænastuna, sum hevur ábyrgd fyri burturkasti á sjónum.
Annars sigur Bárður Enni, at Heilsufrøðiliga Starvsstovan fyrst yvirtekur ábyrgdina fyri burturkastinum, tá tað er komið í land.
V&B - bert tað sum flýtur á sjónum
Elmar Olsen, leiðari á Vaktar- og Bjargingartænastuni, sigur, at hesin stovnur bert hevur ábyrgdina av burturkasti o.ø., sum flýtur í sjónum, og av at havnarskrivstovurnar kring landið hava umstøður at taka ímóti vanligum burturkasti og spillolju frá skipunum.
- Koma vit fram á nakað, so taka vit tað upp, men vit kunnu ikki siga við mannskapið á skipunum, at tey skulu rudda umborð, men skipini hava eisini loyvi at hava burturkastið umborð, sigur Elmar Højgaard.
Á Havnarskrivstovuni í Havn sigur vakthavandi, at skipini regluliga leggja at bryggju, fyri at sleppa av við spillolju og burturkast.
Vanligt burturkast
og spillolju
Hann sigur, at flest øll skipini hava burturkastið í plastposum, eins og vanlig húsarhald, og at bingjur eru tøkar til hetta endamálið. Harnæst eru tangar til spillolju. Eftir hvat skilst, so er einki eftirlit annars við virkseminum úti á Redini.
Fyri tveimum vikum síðani handaði ein arbeiðsbólkur, settur av Landsstýrinum, uppskot um havumhvørvislóg fyri Føroyar. Í hesumuppskotinumverður mælt til at geva Heilsufrøðiligu Starvsstovuni heimildina at kanna sjógvin.
