Ætlanin er at hava fund í Florida millum amerikanska forsetan, Donald Trump, og ukrainska forsetan, Volodymyr Zelenskyj, sunnukvøldið okkara tíð.
Tað vátta Hvítu Húsini sambært tíðindastovuni dpa.
Í ætlanini um fundarvirksemið um vikuskiftið skriva Hvítu Húsini, at fundur verður í Palm Beach í Florida klokkan 15 lokala tíð. Hetta svarar til klokkan 20 okkara tíð.
New York Times hevur eisini fingið sendað ætlanina um fundarvirksemið, sum vísir fundin millum forsetarnar báðar.
Fríggjadagin boðaði Zelenskyj frá, at hann hevði fund við Trump, men hetta varð ikki beinanvegin váttað av Hvítu Húsunum.
– Um vikuskiftið, trúgvi eg sunnudagin í Florida, hava vit fund við Trump forseta, segði Zelenskyj sambært tíðindastovuni AFP.
Fundurin millum Zelensky og Trump verður, nú USA framvegis tosar við bæði Ukraina og Russland um eina møguliga ætlan fyri, hvussu skjótt fýra ára gamla kríggið skal endast.
Í dag luttekur forkvinnan í ES-nevndini, Ursula von der Leyen, í telefonsamrøðu við Zelensky og aðrar leiðarar í ES. Tað sigur ein talsmaður fyri von der Leyen sambært tíðindastovuni Reuters.
Í samrøðu við netmiðilin Axios fríggjadagin segði Zelensky, at hann er til reiðar at útskriva fólkaatkvøðu um friðarætlanina - um Russland tekur undir við vápnahvíld.
Zelensky hevur áður nevnt, at hann kann hava brúk fyri góðkenning frá ukrainska fólkinum, um ukrainarar enda við eini semju, har teir skulu geva frá sær øki.
Nakrar fáar týðandi tættir í teimum ætlanum, sum verða umrøddar, eru trygdartrygd fyri Ukraina og umbygging av landinum og búskapinum.
– Vit fara at umrøða skjølini og trygdartrygdirnar, segði Zelensky fyrr fríggjadagin við tíðindafólk.
– Hvat viðkvæmum viðurskiftum viðvíkur, so fara vit at tosa um Donbas og kjarnorkuverkið í Zaporizhia, og vit fara heilt sikkurt at tosa um onnur evni, segði hann.
Russiski varauttanríkisráðharrin, Sergei Ryabkov, segði við russiskt sjónvarp fríggjadagin, at tað kann vera trupult at fáa eina friðaravtalu í lag. Sambært Ryabkov er hetta tí, at Ukraina hevur lagt "radikalar broytingar" afturat friðarætlanini hjá USA.
/Ritzau/
