Logos Hope liggur við vestaru bryggju í Klaksvík, og í dag, fríggjadag, verður aftur høvi hjá almenninginum at vitja skipið.
Skipið, sum føroyingar best kenna sum gomlu Norrønu, er í dag eitt altjóða trúboðaraskip. Umborð búgva og arbeiða fleiri hundrað sjálvboðin úr nógvum ymiskum londum.
Bókasølan og kaféin lata upp klokkan 10 í morgun og eru sambært skránni opin til á midnátt.
Logos Hope hevur heimsins størsta flótandi bókahandil. Har eru túsundatals bøkur til bæði børn og vaksin, og úrvalið fevnir millum annað um barnabøkur, skaldskap, vísindi, søgu, mál, matgerð og kristnar bøkur.
Frá klokkan 14 til 23 verður skipað fyri rundvísingum umborð. Hetta gevur vitjandi høvi at síggja meira av gamla føroyska ferðamannaskipinum og fáa innlit í lívið hjá altjóða manningini.
Í kvøld klokkan 20.30 verður ungdómsmøti umborð. Sambært almennu síðuni við skránni er ungdómsmøtið útselt.
Logos Hope verður liggjandi í Klaksvík alt vikuskiftið. Leygardagin lata bókasølan og kaféin upp klokkan 10, og sunnudagin verður millum annað altjóða gudstænasta um morgunin. Vitjanin endar við einari felags farvælløtu á vestaru bryggju sunnukvøldið klokkan 22.
Nærri kunning um vitjanina og skránna fæst á almennu síðuni hjá OM við skránni.
