Jana vann á Súnu í bestu donsku hondbóltsdeildini

Øll fimm føroyingaliðini í bestu donsku hondbóltsdeildini hjá kvinnum vóru í leiki í kvøld, og harímillum var ein føroyingauppgerð.

Jana Mittún og liðfelagarnir í Viborg vunnu á heimavølli stórsigur 38-26 á Súnu K. Hansen og liðfeløgum hennara í Skanderborg. Í steðginum var Viborg á odda 18-14.

Jana skoraði fýra mál upp á fimm málroyndir, og hon legði eisini upp til trý mál (assist). Súna skoraði tvey mál upp á fýra málroyndir, legði upp til fýra mál, og hon vann eisini liðnum fýra brotskøst.

Liðið hjá Maritu Mortensen, HØJ vann á heimavølli 30-23 á EH Aalborg. Í steðginum var HØJ bert á odda við einum máli, 12-11.

Marita skoraði trý mál upp á fimm málroyndir. 

Maria P. Nólsoy og liðfelagar hennara í Horsens taptu á heimavølli greitt 20-30 fyri stórliðnum, Esbjerg sum var á odda 14-8 í steðginum. 

Maria skoraði eitt mál upp á tríggjar málroyndir, legði upp til tvey mál, og hon vann liðnum trý brotskøst.

Liðið hjá landsliðsmálverjanum, Rakul Wardum tapti stórt á útivølli 24-37 fyri Nykøbing Falster. Í steðginum var heimaliðið á odda 19-8.

Rakul hevði eina bjarging í 10 málroyndum. Kappingarneytin, Stephanie Christensen bjargaði sjey av 24 málroyndum. 

Støðan undir seinasta leikumfarinum vísir, at í minsta lagi tvey, kanska trý føroyingalið fara at vinna seg í ovara endaspæli. Tvey ella trý føroyingalið fara at spæla í niðara endaspælinum: 

Páskaaftan klokkan 15 spæla føroyingaliðini hesar dystirnar í seinasta leikumfarinum í grundspælinum:

EH Aalborg-VIBORG, Ikast-HØJ, SKANDERBORG-Silkeborg/Voel, RINGKØBING-HORSENS.